Kaupapa: Entertainment

I whakamiramirahia ngā iwi taketake i te pō tuku taonga Golden Globes

Wepiha Te Kanawa

Ko te whakamana i ngā iwi taketake o te ao tā te whetū o Hollywood, tā Leonardo DiCaprio i tana kōrero whiwhi tohu i ngā tohu Golden Globes inapō. 

He kōrero i tau ki mua i te aroaro o ngā tino o te ao whakaari, hanga kiriata hoki tatū atu ki ngā miriona kai-mātakitaki huri noa i te ao.

I tae takitini mai ngā toa o te ao kiriata o Amerika, ko Ryan Gosling, ko Brad Pitt, ko Jennifer Lawrence rātou ko Will Smith.

Heoi āpiti atu ki ēnei toa o Hollywood, tērā tētahi āhuatanga i taringa areare atu ai te iwi.

I whakamihia ngā iwi taketake o te ao e Leonardo DiCaprio, te toa o te wāhanga kaiwhakaari tāne mō tana tū i roto i te kiriata, The Revenant.

He tū māia tēnei e ai ki te kaiwhakaari Māori a Te Kohe Tuhaka.

Engari ehara tēnei i te wā tuatahi ka noho te pō tuku taonga hei papa whakakōrero i ngā nawe iwi taketake.

I te tau tahi mano iwa rau whitu tekau mā toru, i tū a Sacheen Littlefeather, he uri Apache, ki ngā Oscars hei kanohi mō Marlon Brando.

Ināianei ko te manako kua para ngā kupu a DiCaprio i te huarahi mo te whakamanatanga o ngā iwi taketake o te ao.