I whai hua a Aotearoa i te taenga mai o te Whānau Ariki

Mai i Te Whanganui-a-Tara, ki Otepoti, ki Otautahi, he haerenga roa i takahia e te whanau Ariki i te wiki kua pahure ake nei, ā, i te rā nei, i wehe atu rāua i Aotearoa.

Mō te wiki nei i whaiwhai haere a Te Kāea i a Wheao Wiremu me tōna hoa rangatira a Kate, me tā rāua pēpi a George, engari mā wai ra e tino kite i ngā hua?

Kāore te ua i aukati i tētahi pōwhiri whakamutunga ki a Wills rāua ko Kate.

I te wāhanga whakamutunga o te haerenga nei, i tae atu te iti me te rahi ki Te Whanganui-a-Tara ki te kite i a rāua. Ā, ko te urupounamu, ko wai i whai i ngā tino hua o tēnei haerenga, ko te Whānau Ariki, ko Aotearoa rānei?

Kāre e kore, mā te haerenga o te whānau Ariki, kua kitea whanuitia te Ao Maori, engari kāore te katoa e tika ana, arā te taunuhanga a CNN i ngā āhuatanga Māori. Ahakoa ngā kupu whakapāhā a te kaikawekōrero o CNN, i pāmamae tonu ētahi.

E ai ki a Ngāi Tahu, mā te wa ka kitea ngā pānga ka taka iho ki a rātou, engari e kore e taea te hoko i te momo whakatairanga i hua ake i tēnei haerenga.

Hēoi mehemea he muhukai te āhua o te tangata ki te Kāhui Ariki o Ingarangi i mua i tēnei haerenga, he mārakerake te kitea, kua rereke rā tērā whakaaro.

Nā reira, te āhua nei i whai hua tahi te Whānau Ariki me te Māori i te wiki kua pahure ake nei, hēoi mō nāianei, ka wehe a Wills, Kate rātou ko George ki Ahitereira, ki reira toha ai i ngā hua o te toronga a te Whānau Ariki ki te ao.