Huri Dennis - Homelessness recommendations good starting point

Talisa Kupenga , Te Kāea

Kei te karanga Te Pāti Māori rātou ko Ngā Kākāriki me Te Rōpu Reipa ki a Nahinara kia kamakama mai ki te rongoā i te mate noho kāinga kore e ngau nei i te motu. E whai ana tēnei i te putanga o ngā hua o te whakatewhanga a ngā rōpū tōrangapū o Pāremata mō te mate kore kāinga i te rā nei, he neke atu i te rima rau ngā tāpaetanga kōrero a te iwi kua whakawhāitihia ki ngā tūtohutanga e rua tekau.

Ko te whakapae e rua mano rima tekau miriona tāra te utu mō te hunga kāinga-kore ki te kawana ia tau. Ā, i tēnei rā mō taua hunga i te ao huri noa, i puta ā rātou kōrero i roto i ngā hua o te whakatewhanga a ngā rōpū tōrangapū.

Ko ētahi tūtohunga; me noho ko te Whare Tuatahi te rautaki tuatahi ka kōkirihia, me whakatū rautaki kia whakakorea ai te kāinga kore ki Aotearoa, me maha ake ngā whare Kaporeihana Whare , ā, me whakatika te hononga a Kaporeihana Whare  ki te Tari Hiranga Tangata.

Ko tā Dennis he mahi māmā te rapu whare, ko te tautoko kē i ngā whānau te tino wero kia noho haumaru tonu ai ngā whānau.

Ko te karanga a Dennis kia whakauru te tikanga Māori ki ngā rautaki, ina hoki ko te nuinga o te hunga whā tekau mano e noho kāinga-kore ana he Māori, ā, ko te noho ā-whānau nui, ā-ngātahi hoki, ētahi tikanga kāore i te arohaina e Kaporeihana Whare.