Hei tā te Manatū Whakahiato Ora ki te Kāwanatanga me taupoki te pūtea mō te hunga rawakore

E ai ki ētahi pūrongo i puta i te Reo Irirangi o Aotearoa i tēnei wiki, i tītohu ake te Manatū Whakahiato Ira ki te Kāwanatanga kia taupokina ngā pūtea hei whawhai i te pakanga ki te rawakoretanga.

E matekiri ana a Tākuta Tracey Mackinstosh te heamana takirua o te poari mātanga e tohutohu nei i te Kōmihana Tamariki, me te āki kia nui kē ake ngā mahi hei patu i te pōharatanga tamariki.

He raru ki tai, he āhuatanga e kaha kitea ana i ngā whānau Māori.  Ā, e ai ki tētahi mātanga mō te rawakore, kua hē ngā mahi a ngā kai-mahi o te manatū.

I whai wāhi nui a Tākuta Tracey McIntosh ki te whakaeminga o te rīpoata a te Komihana Tamāriki mo te rawakore o ngā tamariki.

E mārama ana a Te Kāea, i puta ngā whakatau a te Manatū ki te Kāwanatanga mō te rīpoata rā, pērā i te tohatoha pūtea nui ake ki ngā whānau whai tamariki nohinohi, i ō ngā whānau whai tamariki pakeke.

E whētuki ana a McIntosh i ngā tohutohu a te Manatū, ā, e ai ki a ia, he ātete ki ngā kitenga o te pūrongo kākāriki, o te pūrongo mā hoki i whakaputaina e te Manatū tonu.

Ahakoa tērā, ko te hiahia a McIntosh kia whai rongoā te kāwanatanga mō tēnei raru nui, ā, kia kaua e haukoti i ngā pūtea tautoko.