Hei mea nui te tiaki kararehe i tētahi pāmu Māori ki Rotorua

Mere McLean

Nā runga i tētahi amuamu mō te tiaki kararehe ki te Manatū Ahu Matua i te Māhuru kua noho mai tētahi pāmu Māori ki Rotorua ki te takahuri i o rātou tikanga mō te tiaki kararehe ki runga i te pāmu. 

He karanga kua puta mai i te rōpū SAFE for animals kia whakarereke te Manatū i o rātou ture mō te tiaki kararehe ki Aotearoa. Mai i tōna ohinga he kai ahu whenua a Jason Perry, ā, i tēnei wā koia te kaiwhakahaere mo te pāmu Māori o Parekarangi, pātata ki Rotorua.

Hei tāna he mea nui te tiaki kararehe ki tōna pāmu, engari i ētahi wā kua tātāhia rātou e te hunga whānui mō tērā mahi. 

I te Māhuru, he tono amuamu i tukuna ki te Manatū Ahu Mahi e te rōpū SAFE for animals e pā ana ki ngā mahi tūkino i ngā punua kau, he mea i mau ake e te kāmera. 

Ki roto i tētahi kōrero a Nathan Guy, Minita Manatū Ahu Mahi he whakatewhatewha e rere ana mo ngā whakaahua i mau, kāre pai ngā tūkino i te kararehe tae noa ki ngā pēpī. 

Engari mo ngā kai ahu whenua pēnei i a Jason Perry ko ngā tikanga tiaki kararehe he ture whakahaere mō te hunga ahu whenua.

Ki Aotearoa, neke atu i te rua tekau piriona tāra ka ahu mai i te pāmu kararehe ia tau, nā kona te karanga a ngā rōpū pēnei i a SAFE for animals kia whakatū i tētahi tari motuhake hei tiaki i te kararehe ko te wawata hoki kia noho mai ngā kai ahu whenua pēnei i a Jason Perry hei kaitohutohu.