He whānau i Te Papaioea tērā e tangi ana i te ngarohanga atu o ngā uri tokorua

Aroha Treacher

I rāmemene atu te whānau ki te wāhi o te tokorua i kaingia e ngā matikara o Hinemahuika  i Te Papaioea.  I pahū ake te ahi i te toru karaka i te atapō ki tētahi whare papanga e rua a te Kāwanatanga me te maha hoki o ngā waka kaipatu ahi i tae atu kia tīneia te ahi.

Tīwewe ana ngā kare ā-roto o te whānau pani i tae mai ki te tuku mihi, ki te tuku aroha ki o rātou whanaunga.

E kaikinikini ana te ngākau o te hapori nei me te ringa kaha o aituā.  I te atapō nei he rua tekau neke atu ngā kaipatu atu i tīnea te ahi.

He tekau mā tahi ngā whanaunga e noho ana ki kōnei i te wā i tahu te ahi.  Tokoroa i hemo, he tipuna whāea i ōna tau ono tekau, me tana mokopuna kōtiro, he ono noa iho ōna tau.

Ko tā te whare kaporeihana, i tērā tau, i whakairia e rātou he puoho auahi tekau mā tahi i taua whare, engari kāore ngā pirihimana i te mōhio mēnā rānei kua tika aua puoho auahi.

Ko tā ngā pirihimana, i te nukuhanga o ngā tūpāpaku i tēnei pō me te mōhio ka tū haumaru te whare, ka tīmata te whakatewhatewhanga kia mōhio ai nā te aha te ahi i tahu ai.