He whakapae whakapaunga pūtea o ngā kaitiaki Kōhanga Reo kei te rere

I ngā tau rua tekau kua hori, he moni tāke kotahi piriona taara kua tukuna ki te kaupapa o te Kōhanga Reo. 

Kua whitu wiki te hōtaka o Native Affairs e tirotiro ana i te mana ako, nā runga i ētahi whakapae mō ngā whakapaunga pūtea i te kouru o te Poari Kaitiaki o te Kōhanga Reo, ā, kāore anō te poari kia whakautu i te pātai, e ahatia ana ngā moni tāke kua whakatahangia mō ngā mokopuna?

He tangi na tētahi kaiako Kōhanga Reo, nā runga i ngā whakapae whakapaunga pūtea a te kouru o te Poari Kaitiaki.

Ko ōna kaiwhakahaere ko Kahurangi Iritana Tawhiwhirangi, rātou ko Druis Barrett, ko Te Wharehuia Milroy.  Ko Lynda Tawhiwhirangi te kaiwhakahaere matua.

I whakamahi a Lynda Tawhiwhirangi i tana kāri nama hei hoko i te panekoti mārena mō tana tamāhine, he kotahi mano tāra hei koha ki tētahi hui kāre ia i tae atu me tētahi panekoti Trelise Cooper, he waru rau tāra te wāriu.

Ko tāna whakautu ki ēnei whakapau pūtea - he wareware no tana tamāhine ki tana kāri utu, kei te pupuri tonu ia ki te koha kotahi mano tāra, ā, i hē tana whakamahi i tana kāri nama nō reira kua whakahokia taua pūtea.

E ai ki ngā ture o te Kōhanga, e kore e tāea te whakamahi i ngā kāri nama mō o rātou take ake, heoi hei tā te tumu whakarae a Angus Hartley, ahakoa he mōhio nō ngā kaimahi o te Pātaka Ōhanga, kahore a rātou ture kari nama.

E ai ki ngā kaiwhakahaere o te Kōhanga, he kino kē te whakapau pūtea a ngā kaiwhakahaere.

Kei te hiahia hoki rātou kia arotakehia ngā pūtea a te Rōpū Whakahaere o te Kōhanga me te Pātaka Ōhanga.