Kaupapa: Crime

He whakakore i ngā mahi tūkino te āki a Ngāti Porou

Aroha Treacher

Kei te whakamana a Ngāti Porou i te whakakorenga o te tūkino tangata i te hainatanga o te kawenata, E Tū Whānau.  I takatū rātou ki ngā tiriti o Tūranganui-a-Kiwa hei tautoko i te kaupapa White Ribbon.

Ia tau, kei kō atu i te toru mano rima rau ngā tāne ka whiua e te ture mō te patu wahine, puta noa i te motu. Nā reira, ki te whakamana o rātou tū, kua tāmokohia te kaupapa, E Tū Whānau, e Ngāti Porou, he kaupapa whakakore patu tangata.

Hei tā Selwyn Parata (Ngāti Porou), “Ngā āhuatanga katoa o roto i tēnei kawenata he whakapakari i te whānau he pupuri i te mauri i te mana o tēnā o tēnā i roto i tōna karangatanga whānau, i tōna karangatanga hapū, i tōna karangatanga iwi.”

He kawenata e whakatoka ana i te whakaaro, ehara te patu tangata i te tikanga o te ao Māori, he kaupapa e kaha tautoko ana i a Ngāti Porou.