Kaupapa: Te Reo Māori

He whai raihana i te reo Māori

Leah Te Whata

He kaiwhakamātautau taraiwa e whakamana ana i te reo Māori. I whakahaere a Richard Waihi i tētahi whakamātau raihana taraiwa i roto katoa i te reo hei whakahē i te whakaaro a ētahi, kāore he painga tō te reo Māori i te ao whānui.

E whai ana a Tawaroa Kawana i tāna raihana i roto i te reo Māori.

Ko tā Kawana, "E hiahia ana au kia māori ake tō tāua reo ki tō tāua ake whenua, koirā te take matua."

E hautū ana ia i te ara e ora ai te reo Māori. He mānuka kua whakatakotoria e ia kia tukua te reo kia rere ki tua o te ao Māori.

"Kei noho tātou ka tuku i te reo kia mate, kia memeha. Kei whakamā, tukuna kia rere, tukuna ki te ao. Kia tikina ake ngā kupu o te waiata o Maimoa, nōu te reo, nōku te reo."

He tuatahitanga tēnei mo te kaiwhakamātautau taraiwa, mo Richard Waihi. Anō i a ia, ka kore e mutu i konei.

E ai ki a Waihi, "Tino harikoa taku ngākau ahakoa ko taku reo he iti noa, i tae mai ia, ka pai, tino pai rawa atu."


Ko tā Kawana, "Nō te whakaaetanga mai a Rihari kia whakamatautia au i te reo Māori, kāore he aha ki au mēnā i hipa, kāore rānei. I rongo au i tētahi mea e kī ana ki au, ae kua tae ki te wā, e ora ana te reo Māori."

Ko te reo te whetū tarake o te rangi. Ko Tawaroa Kawana kei te kāhui whai raihana matua.