He wero kua puta i te Pirimia o Hamoa mo te rōpū Reipa

Kapi katoa ana te whenua o Hamoa i te hunga whakanui i tana mana motuhake, ā, e kore kahore, ko taua ahua ano ra ki Aotearoa. Tata ki te haurua o ngā uri o Hamoa kei Aotearoa e noho ana, na whai ano te wero a Pirimia Tuilaepa ki ta te Rōpū Reipa hiahia kia whakaitia te hunga manene e uru atu ana ki to tatou whenua.

I te tau kua hori e whitu tekau ma tahi mano te tokomaha o te hunga manene i uru atu ki Aotearoa. I raro i tētahi whakāetanga motuhake, kotahi mano kotahi rau ngā tāngata ia tau ka whai nohoanga pumau mai i Hamoa. Apiti atu, ko tata atu i te kotahi mano ka whakāetia mō ngā mahi kaupeka.

Tuturu e kore a Nahinara e moumou i tēnei taonga kowhiringa pōti, matua rā i tēnei wā whakatairanga i tana haerenga i Te Moananui a Kiwa.

Kāti, e ai ki a Pirimia Tuilaepa kei te tuwhera ngā ringa o Hamoa i runga i te take manene. 

“He take nui tēnei mo ngā whenua iti ko te whakarahi ake i te hunga mōhio ki te mahi i ngā mahi katoa hei whakawhanake i te ō`hanga o te whenua."

No reira, e ū ana enei Pirimia ki te whakaaro kotahi, ka mutu, me matāra a Reipa kei mahue i te pahi, otira, kei wehe ko ana kaitautoko.