He wero kia tika te utu mahi ki Aotearoa

Leah Te Whata

He whakatūtū te haere ake nei ki ngā ratonga mahi e whā ki Aotearoa i te hiahia o ngā kaimahi o te rāngai tūmatanui, ngā nēhi me ngā kaiako kia tika ai te whakawhiwhinga pūtea ki a rātou.

E ai ki te tūmuaki o Te Wharekura o Manurewa, ki a Mahia Nathan, me aro te kāwanatanga ki ngā nawe.

"Kua kake ngā mahi, kua rahi ake ngā mahi, ka mutu ko te utu ka noho tonu ki raro."

He tāpaetanga pūtea kei te takiwā o te rua ira rua me te rua ira ono ōrau i ngā tau e toru kua horahia e te Tāhūhū o te Mātauranga ki te aroaro o ngā kaiako kura tuatahi.

"Pēnā ka rahi te utu, ki au, kua rite anō te rahi o ngā tauira e uru mai ana ki roto i tēnei mōmō mahi."

He āpiti, e ihu parehe ana ngā nēhi ki te rima rau miriona tāra e toutou ana ki te karo i te korenga mahi tuatahi ka kitea i ngā tau toru tekau.

"Kua hōhā pea ngā kaimahi ki te āhuatanga o te mahi, ka mutu horekau kē te rahi o ngā mahi e rite ana ki te āhua o te iti o te pūtea. Ki au horekau ngā kaiako i te rerekē ki ērā o ngā kaimahi e mahi ana ki roto i ngā tari kāwanatanga."

Ā, neke atu i te whā mano ngā kaimahi o te rāngai tūmatanui e whakatika ana ki te porotēhi ki Te Tari Taake, ki Hīkina Whakatutuki anō hoki ā tērā marama. Ko tā te tūmuaki o Te Wharekura o Manurewa, tā Mahia Nathan, me aro te kāwanatanga ki ēnei kaupapa.

"Kei te pēnei tēnei rōpu, kei te pērā tērā rōpu, ko wai anō ā muri atu i tērā? Me rapu e rātou tētahi rongoa, ki te kore, tērā pea ka pupū ake ērā atu o ngā rōpu kāwanatanga."

E hui ana nga mema o Te Riu Roa hei ēnei wiki e rua kia whai urupare mehemea ae, kāo rānei ka whakaae rātou ki te tāpaetanga a Te Tāhūhū o Te Mātauranga. Ki te kore, ka whakatūtū rātou hei te marama o Here-Turi-Kōkā.