Kaupapa: Environment

He wero i te marea kia whai whakaaro ki ngā mahi hokohoko

Te Kuru o te Marama Dewes

Neke atu i te rua mano tāngata ki Aotearoa, ki rāwāhi anō hoki, kua whakakotahi ki raro o te maru o Pipiri Ki Papatuanuku, he hinonga rangatahi hei whakaohohooho i te tangata ki āna ake mahi hokohoko ia rā, ia rā e toitū ai te taiao.

Whakatinanahia tō pepeha, koia te karanga a ngā māngai o te kaupapa o Pipiri ki Papatuanuku.

“Hei timatanga noa iho pea, ko te tukurua. Mā tērā koe e whakaaraara i ō whakaaro mō tō aroha ki a Papatuanuku me tō pepeha,” te kī a Tamako Ormsby.

Nā Waimirirangi Koopu-Stone rāua ko Tamoko Ormsby te hinonga nei whao. Ko te ngako, he wero i te marea kia whai whakaaro ki ngā mahi hokohoko, kia whai i ngā rautaki tukurua, ka mutu, kia whakakoretia te kirihou.

Ko tā Tamoko Ormsby, “E iwa ngā huarahi kia whai i tēnei kaupapa. Toru mō te kai, toru mō te para, toru mō kirihou. Mā ēnei momo rautaki iti nei e whakamana koe i tō pepeha.”

Hei tā Waimirirangi Koopu-Stone, “Ko tērā te whainga matua, i te wā ka uru atu koe ki te toa, kei te whakaaro koe mō te whānuitanga o tēra momo mea.”

He rua mano ono rau ngā tāngata kua tomo ki te maru o te kaupapa o Pipiri Ki Papatuanuku, kia haere ngātahi ai, kia tohatoha i wā rātau mahi.

Ko ngā tāngata tauhou, te hunga kore-mīti, te hunga kaha ki ngā mahi tukurua, otirā te hunga e ngākaunui ana ki te ao Māori, katoa kua korowaitia ki tēnei kaupapa.

He māngai a Deyne Painiting-Davis i timata i runga i  ngā whakaaro hauora.

Kua tō te kākāno mō ēnei mea, ngā mea tikina i ēnei ipu, kia kore mātau e haere ki te hoko i ngā mea kirihou,” te kī a Painting-Davis.

Kei te kawe te tokorua nei i ngā kōrero ki rō kōhanga, ki rō kura kaupapa anō hoki kia whakatōngia te kākano ki ngā teina, ki ngā tamariki.

He rerekē ngā taumata, engaria te tohutohu a ngā māngai, whaia te ara e taea e koe.