He urupounamu kua puta e pā ana ki te pūtea titari toru tekau miriona a Te Amorangi Matauranga Matua

Ia tau he puna toru tekau miriona tāra ka titarihia atu e Te Amorangi Matauranga Matua ki ngā rōpu rangahau ikeike.

Ko Ngā Pae o Te Māramatanga tētahi o era kua waimarie i ngā tau, engari karekau tera mō te whakahoungia ā hāere ake nei.

He puna whakataetae te putea rangahau ikeike, ā, e tika ana kia ōrite ngā ture ma te katoa.

Engari mō te taha ki te roopu Ngā Pae o Te Māramatanga, tuturu koia anake te rōpu rangahau ikeike Māori o te motu.

Na kona te karanga e ētahi mema paremata Māori kia tautokotia tonutia a rātou mahi.

E mohiotia ana ko Ngai Māori tērā kei raro e putu ana mō ngā tatau kikino, hauora, matauranga, ngā kaupapa toko i te ora, me te maha noa atu.

Ko te rangahau tētahi ara e kitea ai he rongoa mō ena tuāhua.  Noreira ko te patai, ae ranei me whakatōpū pūtea motuhake te Kāwanatanga ki te rōpu rangahau ikeike a Ngai Māori mō Ngai Māori?

Kāti hei te paunga o tērā marama ka whakahuatia te hunga i tutuki a rātou tono pūtea rangahau ikeike.

Hei reira wātea ai te Minita ki te whakawhiti kōrero me Ngā Pae o Te Māramatanga, otirā, te ara whakamua pea mōna.