Kaupapa: Entertainment

He tūtakinga motuhake me UB40 i mua i te whakataunga atu ki Waitangi Marae

Wepiha Te Kanawa

Kei konei a UB40 i Aotearoa nei me ngā kaiwaiata a Ali Campbell, Astro and Mickey Virtue.  He tūtakitaki te mahi ā ētahi hunga waimarie ki Tāmaki, i mua i te tuatahi o ngā konohete a te rōpū nei i ngā māra waina o te motu ā tērā wiki.  Nā Ngāpuhi te reo pōhiri ki te rōpū, kia whakatauria rātou ki te marae o Te Whare Rūnanga i Waitangi ā te pō nei.

Pēnei i te waiata a Neil Diamond i whakahōungia e rātou i te tau tahi mano iwa rau waru tekau mā toru, rērere ana, ko te waina whero.

Hei tā te kaiwaiata rongonui, tā Ali Campbell, i tana taenga mai ō-mua ki Aotearoa hei kaiwhakawā i te hōtaka New Zealand's Got Talent, nā te waina whero rā tana pito i puta ai.

Kei konei a Ali, rātou ko Astro, ko Mickey Virtue mō ā rātou konohete hōu, me te tirotiro haere i ngā āhuatanga whakamīharo o Tāmaki.

Ko tā Campbell whakatau, he pāti te mahi a te pēne, e pōhiri ana ki te marea kia pāti ngātahi ai me te rongo ki ngā oro hōu o te kōpae, Silhouette.

Neke atu i te toru tekau mano ngā tīkiti kua hokona atu mō a rātou konohete māra waina ki ngā wāhi e whitu i te motu.  Ko ētahi konohete kua hūnukutia, nā te tokomaha o ngā tāngata.

Hei tā Campbell anō, e rima kē ngā konohete Raggamuffin kua tutuki i a rātou, nā reira i puta te whakaaro kia rerekē te huarahi i tēnei tau.

Kua rere hoki te pōhiri a Ngāpuhi ki a rātou kia tomo ki Te Whare Rūnanga o Waitangi.  Hei tā te pēne, he tino hōnore.

E ai ki a Astro, kāore e kore he hui nui whakaharahara kei te haere i Waitangi.

E tūmanako ana te haukainga o Waitangi ka pōhiri rātou i a UB40 ki runga i te marae a te whitu karaka, ā, ka kotahi atu rātou ki te hākari nui.