He ture hou kua whakaritea ki ngā whare puna kaukau

Renee Kahukura Iosefa

E hanga hōha ana ētahi mātua ki ngā ture kua whakaritea ki ngā whare puna kaukau. Heoi, kei te tū māro ngā Pouora ahakoa ngā amuamu me te tautoko a te Kaunihera o Tāmaki Makaurau kia riro mā ngā mātua tonu a rātou tamariki e tiaki.

E hanga hōha nei tenei mātua a Chris Morunga ki ngā ture puna kauhoe ahakoa i roto ia i te wai e kauhoe ana i te taha i ōna tamariki tokotoru.

Ki tā Chris Morunga, “Kaore he raru ki te whai i ngā ture. Ae ka mārama ki a rātou he aha te tikanga o ngā ture. Ka noho haumaru ngā iwi katoa engari i roto ahau i te taha o ōku tamariki.”

I raro i ngā ture haumaru o te puna kaukau nei i Mangere, kia kotahi te pakeke ki ia rua tamariki i raro iho i te rima tau. He ture e tautokotia ana e ēnei mātua.

E ai ki te kaiwhakahaere o tētahi hōpua kaukau me ngā pouora, me whai whakaaro mai ngā mātua katoa koinei ngā ture kia noho haumaru ai te katoa.

Hei tā ngā pouora ahakoa te amuamu a ētahi mātua ki ngā ture me mātua whakatinana rātou i ngā ture.

Inaianei e mārama pai ana a Chris me tōna whānau ki ngā ture ahakoa te hōha i ētahi wā, engari ko haumaru i āna tamariki te mea nui.

Hei tā Morunga, “Ki ngā iwi me noho haumaru ngā whānau katoa. Āta tiaki, me āta titiro o tamariki i a rātou e kaukau ana e tākaro ana i roto i te wai.”