Kaupapa: Rugby

He tūmomo kanga te Hakarena ki tā Ngāti Toa Rangatira

Wepiha Te Kanawa

Hei ngā rā e rua ka tīmata te Whakataetae Whutuporo Ipu o te Ao, ā, ko te haka anō tērā kei te pūtake o tētahi kiriata e urutā ana te mātakihia i runga i te ipurangi.  Heoi, ko tētahi kāpene ō-mua a te kapa o Ingarangi kē e ārahi ana i te kaupapa nei.

Ko ia te kiriata hōu e tere ana i te ipurangi.

E whakaatu ana i te kāpene ōmua o Ingarangi, a Matt Dawson e whakatairanga ana i tētahi pakihi hanga kākāhu i te UK, he haka, he kanikani makarena hoki te mahi me te tohu marau, #hakarena.

Ehara i te wā tuatahi e takahia ana te mana o te haka.

E ai ki a Matiu Rei, “Ko tēnei kiriata he mea whakahīhī, kia whakaiti rānei te kapa, te kapa Ōpango me mātou hoki ngā mea Māori.”

Engari ko te take e āwangawanga ana a Ngāti Toa Rangatira he kāpene rongonui e whakamana i te hakarena.

Ki tā Matiu Rei, “Ka arohaina mātou o Aotearoa, ehara te Māori anake, kua kitea hoki te ao ka arohaina ki a rātou.”

I whakairi hoki a Jacamo i tēnei pānui ki tā rātou pukamata e mea ana, “Ki o mātou whakaaro, he miharo rawa te haka! Ehara tā mātou i te whai kia takahi i tōna mana.”

Kāore tētahi nō Jacamo i Manchester e wātea ana ki te kōrero ki a Te Kāea, engari e manako ana a Ngāti Toa ka whai māramatanga te ao, kia kore ai hoki e whakaiti i te haka.