He tono tā tētahi kaumātua kia kaha ake te ako i ngā tikanga haere aruaru

Mere McLean

Kei te whakahau a Tahae Doherty he kaumātua aruaru i te ngahere o Kaingaroa kia kaha ake te marea ako i ngā tikanga haere aruaru. E whai ana tera i te matenga o Connor Brian Phillips, tekau mā tahi tau te pakeke i te wā e aruaru ana i te ngahere o Kaingaroa. 

Neke atu i te whā tekau tau a Doherty e noho, e whakangau ana hoki ki Kaingaroa.  Hei tāna me matatau ngā kaiaruaru ki ngā tūpono i te wā i ā rātou e haere ana ki te ngahere.  

Hei tā Doherty, “Kei te tamariki tonu hoki, i pūhia nei i roto i te ngahere, ā, heoi anō koina ngā raru o ngā āhuatanga i roto i ērā mea e haere ana ki te ngahere ināianei.”

I tū te aituā inanahi nei ki tētahi wāhi pāmamao o te ngahere, pātata atu ki ngā huarahi o Tiriti me Western Boundary.  Ki tā Tahae Doherty me whānui ngā whakamārama o te whakangau ki te rohe nei.

He tāna, “Te take i roto i te paina he mea āta whakatipu na te tangata ka mutu, he mea whakatipu haere katoa ngā paina i roto i te raina, pai noa iho tō titiro tawhiti kē, tō titiro ki roto i te paina.”

Hei tā ngā pirihimana na tētahi pākeke o te ope whakangau i te wā o te whakahokitanga o tōna pū i te mutunga o te hāere te pūtake o te aituā.  Ki tā Tahae Doherty anō me aro ngā kaiwhakangau ki ngā tikanga e pā ana ki te pū.

Hei tā Doherty, "Ka haere ki te ngahere, kāua e pupuhi noa iho kia āta kite koe, kia āta kite koe i te kararehe e pupuhi ana koe."

Otira e haere tonu ana ngā whakatewhatewha a ngā pirihimana e pā ana ki tēnei aituā.