He tono kua puta kia tū ngātahi ngā rangatira ā iwi ki te whawhai mo ngā tika kaimahi

E rere ana te wero a te mema pāremata Māori mō Ikaroa-Rāwhiti ki te kāhui rangatira ā-iwi kia tū ngātahi ai rātou ki te whawhai mō ngā mana kai-mahi.

I tēnei pō tonu, i rangona anō ai te pire menemana kaimahi ki te whare pāremata, e mukua ai te mana wā kaputī a ngā kaimahi me te mana whakarite pikinga utu ā-rōpū.

Kua roa te Rōpū Reipa e hamahama ana i te Kāwanatanga mo ana whakarerekētanga ki ngā tika kaimahi. Inaianei kei te karanga tana kāhui Māori ki ngā rangatira a iwi.

Ko te ture kaimahi i tēnei wā he haurua haora mo te wā tina, e rua ngā wā kaputi tekau mēneti te roa.

Heoi, ki ngā whakarerekētanga ka mukua te here tuku wā kaputi, ka waiho kē mā te rangatira me te kaimahi ki te whakarite tikanga whakaea.  

E ai ki a Meka Whaitiri ko Ngāi Māori tētahi ka tino rongo i te taumaha, ā, kei ngā rangatira a iwi te haepapa ki te whawhai mo rātou.

Ko Haami Piripi te heamana o Te Rarawa, mema o te kāhui heamana a iwi. Kua hikina e ia te mānuka.

Ko tētahi atu wāhanga nui o ngā whakarerekētanga he muku i te here a ngā rangatira o ngā kamupene ki te whakaoti i ngā whiriwhiri a-rōpu me ngā kaimahi. E ai ki a Helen Kelly, perehetini o Te Kauae Kaimahi, he mahi mōrikarika.

Kāti, ina hipa ai te wāhanga komiti o te pire ka anga whakamua ki tona pānuitanga tuatoru ki reira whakamanangia ai.