He tokoiti tonu ngā Māori kei te pōti mo ngā Kaunihera ā rohe

No te ata nei ka oho mai te motu whānui ki ngā whakataunga mo ngā pōtitanga kaunihera puta noa i te motu.

Ehara i te kitenga ohorere kāre i tino eke ngā uri Māori ki te taumata, engari i eke tonu ētahi. Kei a Ripeka Timutimu tenei purongo.

He hikoi roa taa Will Flavell kia tutuki i ōna moemoea hei kaikaunihera, ā inaia tonu nei kua ea.

Hei tāna, “ i nga tau ki mua korekau ngā kanohi Māori korekau ngā rangatahi, na reira ko tenei te wā tuatahi hei kite i tētahi tangata Māori i raro i ngā tau whā tekau ma rima.”

A ahakoa i tata puta ngā whakataunga inanahi nei, kua whakaaro a Will ki ngā kaupapa matua e kaha kitea ana i tenei rohe o Tamaki ki te uru.

He tokoiti ngā uri Māori puta noa i te motu i eke ki ngā kaunihera i tenei tau. Heoi he raru nui i puta, ko te torutoru noa iho o te hunga kaipōti i tuku i o rātou pōti.

I eke a Willow-Jean Prime ki te Kaunihera o Te Raki, he waewae tapu ki ēnei mahi. I kite ia i te ekenga o ngā nama pōti i tona rohe, ko te take pea, he uri Māori i tu ki nga pōtitanga.

Hei tāna ahakoa he iti tonu te nui o Ngāi Māori kua piki ake, he kitenga ahua pai tēra heoi ko tona hiahia kia eke aua nama a ngā tau kei mua.

Tāria te wā ka kite i ngā hua mā Ngāi Māori, me te mea nei he wawata nui ake pea ma te hunga auhou.