Kaupapa: Elections

He take nui mo te nuinga o ngā kai pōti te nohonga rawa kore a ngā tamariki

Aroha Treacher

Neke atu i te kotahi mano ngā tāngata i rangatū i Tāmaki Makaurau, kia kaha ake tā te Kāwanatanga kōkiri ki te whakakore i te pōharatanga o te hunga tamariki.

Hei tā ngā kaiwhakahaere, he tohu tēnei kei te hiahia te iwi ki tētahi rongoā ā-tōrangapū.

E ai ki ngā tatauranga tōrangapu o Whakaata Māori, ko te whai rongoa mā ngā tamariki pohara tētahi o ngā take nui ki te hunga o Ikaroa-Rāwhiti.

Otira, nā te maha o ngā kī taurangi a ngā kaitono tōrangapu, i kōrero tā mātou karere a Aroha Treacher ki te hunga rawa kore.

Kei te tata te wā ki te waru karaka i te ata, kei te kimi kai ētahi, nā reira, ki te hiakai he wharekai kua whakarewaina mā te katoa.

Ia ata o te Rāhina me te Rāmere, he toru tekau ngā tamariki hiakai ka tae atu ki taua wāhi, inā ka kī te puku ka wehe. Engari i tētahi wā, he tata ki te whitu tekau ngā tamariki ka whāngaia e rātou.

Ko tā te kaiwhakahaere ko tā Chantelle Brown, “He pāpouri rawa te kite i te maha noa o ngā whānau e noho rawa kore, hia kai ana, ko te tikanga me hāere tōtika atu ngā tamariki ki te kura heoi mo te nuinga e kore e tāea e rātou te hoko kai, te hoko kākahu mā rātou.”

I puta mai te whakaaro i te pōharatanga o Maraenui i kaikinikini nei, ko tā rātou kōrero kāore te Kawantanga i aro ki a rātou.

Ko tā Chantelle ano, “kei te whānui ake te āputa ki waenga i te hunga rawa kore me te hunga whai rawa, kei te mahue iho te Kāwasnatanga i ngā whānau e noho taumaha ana.“

Haunga rā ngā paraoa i tākohatia, i utua te nuinga o ngā kai e ēnei kaiāwhina, he utu e pīkautia ana e rātou kia tau ai ngā puku o ngā tamariki.