He rangatahi te nuinga o Ngai Māori e ai ki ngā tatauranga

I te pō o te kaute nui, rua mano tekau mā toru, kei tōna rima rau, e iwa tekau mā waru mano ngā tāngata i whakātu atu i ō rātou whakapapa Māori.

He pikinga mā te rima irakati iwa ō-rau mai i te tau rua mano mā ono.

Ehara i te kōrero ohorere, ko Ngāpuhi te iwi nui tonu i te motu.

Ko ngā uri o Ngāi Tahu me Tainui kua tino rahi ake nō te tau rua mano mā ono. Engari anō te nui o Te Arawa, kua heke iho mā te tekau mā rima ō-rau.

E ai ki ngā tatauranga, he hanga pūhou te nuinga o te taupori Māori. Ko te tau pakeke o waenganui, he rua tekau mā toru, ā, he tino rereke ki te tau pakeke o-waenganui o te motu whānui, he toru tekau mā waru.

Huri atu ki te ao mātauranga, e toru tekau mā ono mano ngā tāngata kei te mau tohu paetahi, tohu teitei ake rānei. He tino pikinga tēnei, mā te rima tekau mā ono ō-rau mai i te tau rua mano mā ono.

Engari, he teitei tonu ngā tatauranga koremahi mō te Māori, he tekau mā rima ō-rau, he pikinga ake i te tekau mā tahi ō-rau. Kei te Tai o Poutini te rahi o ngāi māori e noho kore mahi ana.

Hei ngā marama e tū mai nei, ka whakaputaina e Tatauranga Aotearoa etahi atu korero e pā ana ki te Kaute nui, ā, mā tēnei e mārama kitea ai te noho pēhea a te Māori i tōna whenua.