Kaupapa: BUDGET

He pūtea tautoko mo te rangahau Māori

Kua pae mai te māramatanga ki uta, e kitea ai te orangatonutanga o ngā putea tautoko i tētahi pito rangahau kairangi Māori.

E rima miriona taara ka tuku atu ia tau, timata mai ana a te tau rua mano mā ono, kia whakahaere i tētahi Whare Rangahau Kairangi Māori.

Ka uru mai ngā putea hou a te wā ka mimiti te kirimana o Ngā Pae o Te Māramatanga a te marama o Tihema, rua mano te kau mā rima.

Hei tā Tracey Mclntosh, “I puta te karere, kihai ngā Pae i riro ngā putea taunaki CoRE i te Pepuere o tēnei tau.”

“Mai taua wā, kua whakapau kaha ngā kairangahau Māori, iwi taketake o te ao whānui hoki, ki te kite ake he aha rā te anga whakamua, nō reira e hari ana te ngakau i tenei whakatau.”

Mō te puna putea hou, ka tūwhera i āna tatau ki ngā tono ka ahu mai i ngā Kairangahau Māori, ngā Wānanga Rangahau Māori, hoino, arā tonu te patai me tuku atu ki te Minita Take Māori, nā te aha, kihai ngā putea taunaki CoRE i tuku atu ki Ngā Pae o te Māramatanga, ahakoa kua riro ia rātou ngā putea taunaki a Te Amorangi Mātauranga Matua mai anō i te tau rua mano mā rua. 

E wawata ana a McIntosh, ko te Māori tēnā ka whai wāhi nui ki te kowhiri i ngā putea rangahau Māori hou, a, hei tāna, ka ngana rātou o Ngā Pae o Te Māramatanga ki te waihanga tono e puta ai ngā hua nui mō ngā mahi rangahau Māori ko te heke mai.