Kaupapa: Kōhanga Reo

He pūtea nui e whāia ana e Lynda Tawhiwhirangi hei whakataunga whakawātea tūranga mahi

Ko Lynda Tawhiwhirangi tera kei te keo o ngā tironga homiromiro a te arotake ōtita o te Manatu Matauranga.

Te toihau o mua o Te Pataka Ohanga e whakapaetia ana ia mō ngā mahi raweke putea kei ngā mano tāra te wariu.

Kare ano ngā kitenga o taua purongo ōtita kia puta, engari kei te whaia e ia tētahi whakataunga whakawatea i tana turanga kei te takiwā o te wha rau mano tāra.

He whika ohorere ki a Waiarani Harawira, tētahi o ngā kuia o te kāhui Kohanga Reo o Mataatua Tauranga Moana nānā i hika ai ngā pātai mō tēnei take.

Hei taana, “Kei te whakawhiwhia ano i a ia i tetahi pūtea ka patai ahau, kei te aha kē tātou? ara ake ano te tangata kei te hē a ia kei te kitea tana hapa i kitea whānuitia tēra e te motu ka whakaaro koe ko te tikanga me mutu pai iho pea ia i reira."

Kāti i hāere ake matou ki te whare o Lynda Tawhiwhirangi ki te rapu whakautu, ā, ahakoa i te kainga ia i taua wā, karekau mō te puta mai.

I whakapā atu a Te Kāea ki tētahi o ngā mema poari o Te Pātaka Ōhanga ki a Te Wharehuia Milroy, heoi ko tāna ki a mātou, “Ki te puta he kōrero kare matou e mohio mena ka tahuri mai a Lynda ki te hāmene i a matou koia ranei ka whaia ki te whakatakoto i te huarahi ki te ture, ko te ture tētahi raruraru nui i tēnei take.”

Ko Druis Barrett, mema poari o Te Pataka Ohanga me te Poari Matua, tētahi e kaha whakahē i te tukunga putea ki a Lynda Tawhiwhirangi, ā, e whakaponotia ana koia i panaia ai ia i te poari o Te Pataka Ohanga inatata nei.

Ko Druis Barrett tetahi i kokiri i te arotake a te poari mō ngā whakapae raweke putea. 

Inaianei kua eke te take ki te taumata torangapu, no nanahi nei karangahia tetahi hui e te Paati Māori me Druis Barrett rātou ko ētahi atu mema o te poari matua.

Hei tā Pita Sharples, “He tauira ratou mō te motu, he rangatira rātou katoa o tena poari, kua tae te wa kia noho whānau ai tātou kia kite ngā Kōhanga ae he roopu rangatira tēnei.”

Ko tāku e rongo nei, kei te hiahia te Poari Matua ki te whakatū i ētahi hui huri noa i te motu ki te āta whakamarama i enei tū take ki ngā whānau Kōhanga Reo.

Aa kaore e kore na ngā take o te wā he maha ngā patai kei te hāere.