Kaupapa: Welfare

He pūrongo anō kua puta mo te noho pōhara a ngā tamariki i Aotearoa

updated

He pūrongo anō kua puta mo te noho pōhara a ngā tamariki i Aotearoa, ā, ahakoa he paku painga kua kitea ake - ara tonu te tokomaha e noho taumaha ana.

He pūrongo anō, he tatau kikino anō.

Tekau ōrau o ngā tamariki i Aotearoa e noho pōhara rawa atu ana ko Ngāi Māori tonu tērā e pakia kahatia ana.

Whai muri mai ko ngā whanaunga nō ngā moutere.

He kōrero kaha tō te Minita hōu mō ngā take Whakawhanake Māori ki te kāwanatanga.

Hei tā Te Ururoa Flavell, “E ai ki a Te Ururoa Flavell, “Kua mutu te wāhi ki te kōrero, kua mutu te wāhi o ngā pūrongo, kua mōhio nei te raruraru. Ka mutu me tititro ngā tari o te kāwanatanga kia whakarerekē i tōna whakahaere.”

Ae mārika e ai ki a Te Ururoa Flavell ko te mate i ngā tau kua hipa ko te ūpoko māro o te kāwanatanga ki te whai i tō rātou ake huarahi. Hei tana kua tini tēnā mohoa nei.

Ki tā Flavell, “Kua rongo nei au i te wero o te pirimia o te minita mo te tahua pūtea kia hāngai tonu te titriro ki tērā hunga. Kātahi anō au ka rongo i tērā kōrero.”

Nōreira he aha te ara whakamua? Ki tā te kāwanatanga ko te whakahāngai i te aro ki ngā rohe e rongo kaha ana i te pōharatanga, ka mutu ko te mahi tahi a ngā manatu.

Ko Flavell tērā e mea ana, “Kia kōrero te tari hauora ki te tari mātauranga, kia kōrero te tari mātauranga ki te tari o te minita mō ngā take Māori he tuatahinga tērā kia timata rātou ki te kōrero.”

E ai ki a Hekia Parata, “Tuatahi, kare he tohu mātauranga, tuarua, kaore rātou e taea te whiwhi mahi nui ake te poutea ka uru atu ki te kainga, tuatoru kare rātou e taea te hoko whare, tuawhā, tuarima, tuaono.”

E ai ki te āpitihana kei runga te kōrero kei raro te rahurahu.

Hei tā Nanaia Mahuta, “Ki a mātou nei whakaaro ahakoa kua kōrero te kōrero, kaore anō kia whakatinanatia.”

Kāti, he hua i kitea i te pūrongo, arā, katoa, katoa, kua heke te tokomaha o ngā tamariki e rongo ana i te pōhara mā te toru ōrau. Heoi, e ai ki a Nanaia Mahuta he mahi nui tonu kei tua.

E ai ki a Nanaia Mahuta, “Ko tēnei pūrongo he wero atu ki te kāwanatanga me whakatu taumata kia whakatutuki i ngā kaupapa kāwanatanga and e tautoko ana ahau i tēna.”

Hei te tau hou kokiritia ai te aronga nui o te kāwanatanga ki nga rohe e rongo ana i ngā pānga nui o te pōharatanga.