He porotēhi hei tautoko i te whakahokinga mai a Ranjeet

I tera wiki, i tae ā-tinana atu ngā whānau Māori e rua ki te Whare Pāremata, ki te whakapuaki, ki te whakaatu hoki atu ki te ana o ngā raiona, tō rātou wairua kōhukihuki.

Ko te whānau o Lisa Singh, he uri no Ngāti Raukawa, Tūwharetoa, tētahi, ā, kua koni atu i te kotahi tau a ia me tana tamaiti a Mahinderpal Singh, e whā tau te kaumātuatanga, e noho hoarangatira, pāpa kore ana.

Nō te tau rua mano mā ono ka tūtaki a Lisa Tupara, ki a Ranjeet Singh.  Ko te ipurangi, te kaiwhakahoahoa, ā, hei tā Lisa, ka pupū ake te aroha, i tō rāua noho ngātahi tuatahi. 

Ka mārena a Lisa rāua ko Ranjeet, i te tau 2007, ā, ka whānau mai ko tētahi tamaiti Iniana, Māori hoki i te tau 2009.

Engari arā tonu ngā kōrero mō Ranjeet Singh.

He ao anō tōna, i mua i tana taenga mai ki te whenua o te Kapua Roa.  Tokotoru āna tamariki ki tana hoa wahine tuatahi, i Inia.  Ka wehe raua i te tau 95, ā, ka mana tō rāua mārena kore i te tau iwa tekau mā iwa.

Ka tae ā-tinana mai a Singh ki Aotearoa i te tau 99, i runga i tētahi tono turuhi.  Ka mārena a Ranjeet, i tētahi wahine pākehā nō Aotearoa tonu, i te tau 2002.

Ka mana tō rāua wehenga i te tau 2004. Hoino, i mua i tana mārena ki a Lisa Tupara, ka noho a Ranjeet hei manene mana-ā-ture kore.

I a Ranjeet e noho ana ki Inia, e noho ana ia ki te taha o tana tamaiti, ki New Delhi.

Ka puta atu ngā āpiha o te Tari Manene, ki te uiui i te hunga noho tata, ā, hei tā ngā kōrero i puta, e noho tonu ana a Ranjeet me tana hoa wahine ō-mua, kīhai rāua i wehe, ā, kua hoki atu ano a Ranjeet ki tōna taha i roto i ngā tau. 

Hoino, kīhai ngā kōrero mai i te hunga noho tata, e whai waitohu ana.

Kīhai te Tari Manene i whakaae kia kōrero ā-kamera, engari ko tā rātou whakahoki e rangahaua ana te take nei e Te Minita Tuarua mō ngā Take Manene.

Hakoa e kawea ana e te Mema Pāremata mō te Tai Hauāuru a Tariana Turia tētahi rangahau mō te take nei, ko te āhua nei kua herea te aroha o Lisa Singh ki te hinu o te pene a Nikki Kaye, ā, e noho pāpā kore tonu ana a Mahinderpal Singh.