Kaupapa: Te Reo Māori

He nui ngā panonitanga mā Ngāi Kōrero

E whakatūpato ana te Minita Whanaketanga Māori, ki te heke tonu te tokomaha o Ngāi Kōrero i te reo Māori, ka titiro anō ia ki te rautaki reo Māori me te whakaaro ia, he nui ngā panonitanga ka puta. 

Hei tā Te Ururoa Flavell, "Mena ka heke te tauranga o te hunga kōrero Māori ko taku ko te kī atu ka titiro ano ra au ki te Rautaki Reo Māori a ngā tau kei mua i te aroaro otira te whakahaere o ngā kaupapa katoa e pa ana ki te reo Māori."

I te tau rua mano  tekau ma whā ka whakaae Te Rūnanga Minita ki te Rautaki Reo Maori hei whakarahi i te mana o te reo. A, hakoa ko te uru mai te Pire Reo Māori ki Paremata aini ake.

Hei tā Peeni Henare, “Kore e roa ka puta mai tatou ki te arohaehae ngā hua o te pire, e hoa, he moumou taima, he moumou moni tērā mahi ki au nei.”

Ko tā te Minita, e aro atu ana ia ki Te Taura Whiri i Te Reo Māori kia tirohia te tokomaha o te hunga kōrero Māori. Na whai ano, kua tuku putea taunaki atu Te Taura Whiri me te Peka Rangahau Matauranga o Te Motu mo tetahi rangahau hou e kawea ake ana i tēnei wa, koia ko Te Ahu o Te Reo Māori. 

Hei tā Flavell, "Kahore au te pirangi kia noho hei minita ka noho nei i te ngoi kore mena ka heke hāere te tauranga o te hunga kōrero Māori".

A, i te rerenga o te toki ki te putea whitu miriona taara a te Taura Whiri ka anga atu ra ki Te Mātāwai, ko tā Flavell, ka tirohia anōtia e ia ētāhi rautaki hou mena koia e hiahiatia ana.

"Me titiro kē ki etahi atu huarahi kia taea ai te whakapakari ake te whakanui ake ranei te hunga e kōrero Māori ana koinei te kaupapa nui. Ehara i te mea ma te moni anake tēra kaupapa e whakatutuki ai tēra kōrero engari ko te aki a tetahi ko te rautaki tēra pea he rautaki hou me āta wanangahia era take kia kite mai ai te puawaitanga o tēra hiahia."

E tumanako ana kia kuhu atu te pire ki Pāremata a te tau hou, ēngari ko ngā hua o Te Ahu o Te Reo e tumanako ana kia puta a te mutunga mai o te tau rua mano te kau mā ono.