Ngā kaupapa: Business, Employment

He mātaratara anō ngā wai o Sealord

E ai ki tētahi mema poari ō-mua o Te Ohu Kaimoana, me poro ngā tūranga mahi kei ngā taumata whakahaere o Sealord, kaua ko āna kaimahi wheketere kē.  E ono tekau ngā tūranga mahi e matapaetia ana ka ngaro ki tana wheketere ki Whakatū, ā, e ai ki a Ngahiwi Tomoana kāore i te tika.

I nga turanga mahi e pawharatia ana pea i Sealord, e aro ana hoki nga maripi ki nga ika nui.

Hei tā Ngahiwi Tomoana, "Ka nui te hinu ki nga management me middle management, kia tapahia etahi o nga pae ki reira pea."

Tē aro i te heamana. 

Ko tā Matanuku Mahuika kōrero, "Kāore i te mohio nga take mo nga korero an ngahiwi i nga wa katoa ka ata titiro a sealord ki ana mahi me nga kaimahi e whakahaere tonu i nga mahi."

Haurua o te kamupene Sealord na te kamupene Aotearoa Fisheries, he mea arahi e Te Ohu Kaimoana, te kamupene hao ika a nga iwi.

E ai ki a Ngahiwi Tomoana, heamana o mua o Te Ohu Kaimoana, ko te poronga turanga mahi he ahuatanga e riterite ana te kitea.

"I tera tau tapahia etahi atu o nga kaimahi kei roto i a Whakatu me nga tau ki muri e rima pea toru rau nga tangata kua whiu atu mai i Sealords," te kii a Tomoana.

Kaati ko te take mo nga poronga, ko te ngaronga putea ki te kai "Kirimi" e hokonatia ana ki Hapana. 

"Inaianei tonu kotahi noaiho te kamupene i hoko i nga kirimi mai i a Sealord ia tau ia tau ka paku rawa te putea ka puta ki a matou," hei tā Mahuika.

Apiti atu ko te wha tekau ma whitu miriona tara i ngaro i te kamupene mo ana mahi ki Aketina e toru tau ki muri, aa, ko te patai ināianei he aha te rautaki whakamua? 

Hei tā Mahuika, "Ko ta matou mahi te whakapai te whakatika i nga ahuatanga hei whakararuraru i a Sealord kia kokiti tonu te kamupene."

Ahakoa kaore te kamupene i eke i tera tau ki te hua putea i wawatatia, hei ta Matanuku Mahuika i whai hua putea tonu, aa, i tukuna ko nga moni hua ki nga iwi.