Kaupapa: Kapa Haka

He mahi whakatairanga i ngā wahine toa

Te Kuru o te Marama Dewes

I tū ai ngā rōpū haka whakahirahira o Waka Huia rāua ko Waihirere, hei whakanui i te 125 tau nō te Te Petihana Whakamana Pōti Wahine, ki Te Taumata Kapa Haka - Wahine Toa o te Ahurei Matariki, ki Tāmaki Makaurau.

He mahi whakatairanga i te mana wahine ki ngā ngahau kapa haka o Matariki.

Hei tā Joe Pihema (Ngāti Whātua) o Te Waka Huia, “Hei tirohanga mā te ao whānui, anei ahau, he wahine Māori ahau, nā reira koina tētahi mahi nui mā ngā tāne Māori i roto i te kapa haka, he tautoko tonu i ō tātau wāhine kia tū māia kia tū rangatira.”

I tū ngā kapa ki te whakanui i ngā tipua wahine o te ao haka i ngā tau kua taha ake.

Ko tā Tāpeta Wehi, “Ko Te Taini tērā, ko Atareta, ko Ngoingoi ko Tuini, toko ō rātau nā reira he mea whakaharahara tēnei me whakanui tātau i a rātau, me whai atu rātau i ō rātau ake ōhaakī kua waihotia e rātau.”

He wā kia tū ngātahi ai ngā kapa ki te ngahau, ki te whakanui i ngā hononga whakapapa kei waenganui i a rātau.

Ko tā Tapeta Wehi, “Nō ngā tau 80 ka hūnuku mātau ki roto o Tāmaki Makaurau, i reira ai ka timata ai tō mātau rōpū arā ko te Te Waka Huia tērā, nā reira he hononga ā rōpū nei he hononga ā-whakapapa nei.”

Hei tā Pihema he waka hourua tēnei mea te kapa haka, arā ko tā te tāne he taunaki i te tā te wahine.

“Kei reira ngā momo kōrero, kei reira ngā akoranga, hei whakaiihiihi hei whakawana i a rātau kia tū wahine ai kia tū mana ai te wahine,” te kī a Joe Pihema.

Hei tā Tapeta Wehi, ko Waihirere ko Te Waka Huia, ko Te Waka Huia ko Waihirere.