Kaupapa: Kōhanga Reo

He māharahara ta ētahi kōhanga ki ngā kōrero kua puta i te hui ā motu a ngā Kōhanga Reo

Mere McLean

Ao ake i tāna whiriwhiri i ngā kōrero i matapakihia i te hui-ā-motu mā ngā kōhanga reo i ngā rangi okioki, kāore Te Kotahitanga o Mataatua Tauranga Moana i te whakaae ki ētahi o ngā whakataunga nui i te hui.

E ai ki Te Kotahitanga o Mataatua Tauranga Moana, kua aweketia e te poari, ētahi o ngā whakaputanga o te hui, mātua rā i te whakatau, kia kaua te karauna e raweke i ngā take o te kōhanga. He whakaaro tēnei kaare i whakāetia e te katoa i te hui.

Mai te hui i Turangawaewae i puta tētahi tirohanga whakamua kia ora tonu ana te kaupapa o te kōhanga reo, ko te whakatutanga o te kahui tirotiro tētahi ki te rapu i ngā whakaaro mō ngā tauira e wha mō te kōhanga reo.

Mauritau ana a Mataatua Tauranga Moana, e iwa tekau ō-rau o te hui i whakahē i ngā tauira katoa.

Ko te kōkiritanga o te kereme tiriti ki te karauna e mea ana kaare i tika te whāngai pūtea ki ngā kōhanga reo, tētahi atu whakataunga kaare i whakaaetia e te katoa.

Ko te take, kāre i whai wāhi ngā whanau katoa ki ngā papamahi katoa, ā, kāre hoki i āta tirohia, i kōrerotia rānei te wā me ngā mahere e tutuki ai taua whāinga.

Hei tā Loraine Hale, “I te mutunga iho, koira te kōrero, i puta, i roto i ngā hui kotahi o te whanau, i mua i te aroaro o te poari, i mua i te aroaro o te Kingi, no reira ko ta rātou e kī ana, kao, whakahokia mai te mana ki te whanau.”