He māharahara kua pupū i te Tatauranga hōu

Ko te Tatauranga rua mano tekau mā waru, heoi he āwangawanga kāre te hunga kāenga kore e kautetia.

Ko tā te Tatauranga he kohi raraunga mō te motu kia haere whakamua, engari kei hea te wāhanga ki te hunga kāenga kore? Koia te pātai a Mārama Fox.

Hei tāna, “Mo te hunga kāenga kāre tonu rātau e mōhio ka haere koe ki hea, ka whakakī i te aha, kāre pea wētahi e mōhio he census kei te haere.”

Ko tā te Tatauranga he ine i te nama o ngā tāngata kei ngā wāhi noho puta noa i te motu.

Hei tā Fox he āwangawanga kei makere i te kupenga te hunga pakeke, te hunga kore wāea anō hoki.

“Ki te kore he kāenga ka tuku tō pepa ki hea? Engari tēnei tau kārekau he pepa ki te kore koe e hiahia, ki te kore koe e waea atu ki te rapu pepa.”

Ko tā te Tatauranga Aotearoa, ka huakina e SeniorNet ō rātou wāhi ako e 70 mā ngā tāngata ki te whakamahi i ō rātou rorohiko.

I raro i Ture Tatauranga kotahi mano iwa rau whitu tekau mā rima, ki te kore te tangata e whakakī kei hāmenetia.

Ko tā Tatauranga Aotearoa, ka āhei tonu ngā kāinga ki te whakakii i ngā wāhanga nei, ki te kore, he utu pea kei te haere.

Engari ahakoa te whainga a te Tatauranga, e kore tonu e mōhio mēnā ka tutuki te pātai ki te katoa.

Hei āpōpō tū ai te Tatauranga, mehemea e hiahia ana koe ki te tono i ngā rārangi pātai pepa, ki te korero rānei ki tētahi tangata i roto i te reo Māori, waea atu ki 0800 236 787.