Kaupapa: Entertainment

He kiriata hōu ka tirohia te orokohanga mai o te waiata rongonui o "Poi e"

Ao ake i te angitū o tana kiriata o Mt Zion, ko te ringa tohu o Ngāti Paoa, ko Te Arepa Kahi tērā, kua tahuri ki te waihanga kiriata mō tētahi atu tino whetū ki te ao waiata Māori.  Ko "Poi e - The Story Behind Our Song" te īngoa o te kiriata, he mea whakanui i a Dalvanius Prime me tana pēne, The Fascinations.

Ko ōna makawe roa, te kite i te heke o te werawera, te āta nekeneke o te tinana, koinei te kaiwhakangahau, te whetu piata o te ao waiata Māori, arā, ko Dalvanius.

Kua tīmata te kaitohutohu Māori a Te Arepa Kahi ki te whakatinana me te hanga i te kiriata Poi E, the story behind our song, e whakanui ana i te hautupua Māori a Dalvanius Prime.

Hei tā Reikura Kahi, "I tino hiahia te whanau kia puta whanui ngā korero mō te titonga o tēnei waiata."

"I tupu te whakāro i tērā tau, kua pau te toru tekau tau mai i te wā i puta tuatahi tēnei waiata whakahirahira nō tātou,nō te motu," ki tā Te Arepa Kahi whakamārama.

Nā te tohunga kaitito waiata a Ngoi Pewhairangi me Dalvanius Prime i tukuna i te waiata i te tau kotahi mano iwa rau waru tekau mā wha, Māori katoa ai, ā i hokona nuitia tēnei waiata i ngā kaitito waiata rongonui o te ao.

"Mohio pea ngā taringa o tēna o tēna o tātou ki ngā kupu, ki te rere o te waiata, engari ko wai o tātou e mohio pewhea hoki tēnei hautupua nō tātou me te rōpu o Patea Māori Club tēnei waiata nei, i kokiri, i puta ki te motu, ki te ao," te kōrero a Te Arepa.

E ai ki a Reikura, "E hia kē nei ngā waiata pakeha i waiatatia i ēra wā, hakoa tēnā ko te reo, ā ko te waiata Māori i eke, nā runga i te atāhua o tō tātou reo, me te whai mana hoki o tō tātou reo."

Heoi hei tā Tuteri Dal Rangihaeata, "I waimarie a Dal, ki te tutaki atu i te kuia a Ngoingoi Pewhairangi, ko tāna he whangai atu i te reo Māori, ko te purongo tēra, me kī tēra waka te kawe ki te motu."

I tupu ake a Te Arepa i roto i te ao puoro, nā tēna ka nui te hiahia mōna ki te whakanui i ngā tohunga o te  ao puoro Māori, i para i te huarahi.

"Te ao e noho nei e tātou he ao i ahua whakaritea e Dalvanius ana ko ngā reo irirangi o ngā iwi, ko Whakata Māori ko ēra mea katoa i puta mai i te werawera o tēnei tangata," te kōrero a Te Arepa.

Ko te tohunga waiata mai te rōpu The Modern Māori Quartet a Maaka Pohatu i tohungia hei whakaari i a Dalvanius Prime.