Ngā kaupapa: Education, Technology

He kaupapa whakapakari pūkenga ako tā Connected Education NZ mā ngā kaiako katoa

Hei te marama o Oketopa, ka whakaratohia e CORE Education tētahi kaupapa whakapakari pūkenga ako kore utu mā runga i te ipurangi.  Ko te wawata, he whakatōpu i ngā pūkenga me ngā mātanga ako o te ao.

Hei tā Te Mihinga Kōmene mā CORE Education, “Ko tēnei kaupapa, he whatunga tangata, he whatunga mātanga, he mahi hei whakawhanake i te ngāitanga o te kaiako, o te tangata me ōnā hiahia kia eke pai ia i roto i te ao mātauranga.”  

E whakahaere ana a CORE Education i tētahi kaupapa ako mā te tangata ahakoa ko wai, ahakoa nō hea, kia taea e rātou te whakapā atu ki ngā mātanga ako mā roto mai i ngā paetukutuku whakawhitiwhiti kōrero, i tētahi matapihi tirohanga ki tētahi hui ako nui. 

Hei tā Mita Mihinga, “He nui ngā huarahi, he pāhorangi, arā ngā podcasts he rangitaki ko ngā blogs, ko ngā paeaataata, ko ngā mea webinars nō reira he mama noa iho te tūhono atu ki tā mātou kaupapa, koirā te painga kahore he utu, ā, e tūwhera ana ki te ao.”

Hei tāna, arā tētahi wahanga o te kaupapa, ka aro atu ki te mahi nui hei whakapiki ake i ngā hua ako o te hunga taitamatāne Māori ki Aotearoa nei.

Hei tā Mita Mihinga, “Me te mōhio kāre rātou i te tino eke pērā i ngā kōhine kei roto i ngā kura nō reira he aha ētahi haurahi hei whakawhanake i ngā mātauranga me ngā mea whakaakoranga ki a rātou.”

E aro atu ana te kaupapa kotahi marama nei te roa ki ngā kaiako puta noa i te motu, puta noa hoki i te ao.  Ko te whāinga matua, he whakapakari i ngā pūkenga ā-tihi hei painga mō ā rātou tauira, hoa mahi hoki.

Hono atu ki te paetukutuku connectededucator mō ētahi atu pārongo.