Kaupapa: Pacific Affairs

He kaupapa kua whakaritea hei whakapakari i te ōhanga o Hāmoa

Ko te whakapakari i te ōhanga ki Hāmoa, otirā ki te katoa o Te Moananui-ā-Kiwa tētahi ara e noho haumaru ai ngā iwi o reira. Ka mutu, kua kore e mate ki te tono pūtea āwhina i whenua kē.

Ao ake i tā Hāmoa whakanui i tōna mana motuhake inanahi, ko te tirohanga tawhiti a te whenua rā ko te tū pakari i te ao ōhanga.

Ko tētahi kei te tira hāere o John Key ko Shane Jones, kātahi nei ka tohua ki te tūranga māngai kāwanatanga mō ngā mahi whakawhanake i te ōhanga ki Te Moananui-ā-Kiwa. Hei tāna, pērā tonu i te iwi Māori, he āhuatanga whakahirahira ō ngā iwi o konei e angitu ai rātou i te ao pakihi.

Hei tā Shane Jones, “Ko ngā tikanga me te poapoa o te whenua tena pea ka poapoangia te marea o te ao whanui ki Te Moananui a Kiwa.”

Ko te ahu whenua tētahi tumahi taketake o Hamoa, neke atu i te ono rau ngā kaipaamu i ngā whenua toru tekau ma rua mano heketea. Heoi, neke atu i te whitu tekau orau o ngā kai o roto i ngā hotera, whare kai hoki ki Hamoa no tawāhi.

Ko te aro a te Rōpū Wāhine ki ro Pakihi he tautoko i te whakawhanake o ngā kaipāmu kia hora kē ko a rātou kai ki ena tēpu.   

Kāti, ia tau neke atu i te toru tekau miriona te putea awhina ka tukuna e Aotearoa ki Hamoa. E ai ki te Pirimia ki a John Key, ina t pakari ai te ohanga o konei ka iti iho tena nama. 

E harikoa ana a Pirimia Tuilaepa ki te whakatunga o te turanga a Shane Jones, māna, te takaroa.

Kāti e kīa ana te kōrero mā tou rourou ma taku rourou ka ora ai te iwi, he tuahuatanga i kitea ake i te rangi nei.