Kaupapa: Crime

He karo taru waihanga te mahi a te Ture

Talisa Kupenga

Ahakoa ngā kōrero a ngā pirihimana, kahore he rangahau e tautoko ana i ngā kōrero e taami ana i ngā taru waihanga. He kino tonu ngā iroiro o roto.

E whai atu ana tēnei i te matenga tuawaru i tēnei marama ki Tāmaki Makaurau e whai waahi atu ana ki te tarutaru nei.

Ko tā te Ope Pirihimana e whakapau wera ana rātou kia patu te taru waihanga nā te nui haere o te weriweri nei ki Tāmaki.

Hei tā Peter Florence, Kairapuhara o Te Ope Pirihimana o Tāmaki, he raruraru nui ngā taru katoa, ko tēnei momo e whakaputa ihu ana i tēnei wā.

I tēra wiki, i ngā rā e rua ka kitea e Hato Hone i te neke atu i te whā tekau tāngata kua pāngia e tēnei āhuatanga. Kōtahi te matenga, ā, neke atu i te rua tekau ngā tūroro ki te Hohipera o Tāmaki, ā, i ngā rā whakatā toko ono ngā tūroro ki te Hohipera o Manukau, kotahi i hinga.

Ko tā Florence, he pānga nui ki ngā whānau.  Hei tāna anō, kua mauheretia ētahi, kua kawea ngā whakatewhatewhanga, ā, e koke tonu ana ngā mahi.

Ko tā Te Tūāpapa Tarukino o Aotearoa me pāho te Ope Pirihimana ō rātou whakamātautau tarukino kia mōhio ai te marea. Whai muri i te hē o ngā ripoata e mea ana, i tunua tēnei momo ki te paitini.

Hei tā Gilbert Taurua o Te Tūāpapa Tarukino o Aotearoa, he iti noa ngā mōhiotanga kei ngā ohu matua, 600 ngā aho o tēnei momo taru e noho mōrearea ai te hapori.

Ko tā Florence, he nui ngā whakamātautau, ko tētahi he tarutaru waihanga.

Ko tā te Ope Pirihimana mena ka kite tētahi e hanga tarutaru ana, e hoko atu ana, e momi ana rānei, whākapā atu ki a rātou.