He karanga ki ngā kaitono takutai moana kia tere whakatau ngā kerēme

Tata ki te whā tekau ngā tono kua whakatakoto ki te Karauna me te Kōti Teitei, i raro i te Ture Takutai Moana rua mano tekau mā tahi.

Heoi, ehara i te mea kua whakaaetia katoatia aua tono rā, waihoki, arā ētahi māharahara mō te taha ki ngā nama, ka tau atu ki ngā kaitono me te taumata e eke ai aua tono ki tōna whakamananga.

He tauhou pea a Te Ururoa Flavell ki tana tūranga minita, engari he ika ahurunui te Pāti Māori mō te Ture Takutai Moana.

Ki tā Flavell, “Kua oti i a mātou te wāhanga ki a mātou i tēnei wā ka waiho mā ngā iwi e whakatau te huarahi e tika ana mō rātou.”

Heoi, he wero tā Nanaia Mahuta ki te Pāti Māori.

Hei tāna, “Mēnā e pono ana rātou ki a rātou ake kupu, kei whea te rongoā?  Kei whea te whakautu ki ngā nawe o ngā hapū me ngā whānau ki te takutai moana i raro i tēnei ture?  Kāore anō kia whakautu ki tēnā.”

E ai ki a Flavell, “He aha te pūtake o te Pāti Māori i tōna tīmatanga, i tōna orokohanga mai?  Ko te pire takutai moana.  Nō reira kua tekau tau pea nō te orokohanhga mai o tēnei kaupapa, anei taua e kōrero nei mō te āhuatanga o ngā take kei mua i te kōti.”

E toru tekau mā waru katoa ngā tono kua whakatakoto i raro i te Ture Takutai Moana.  Tekau mā rua ki te Kōti Teitei, rua tekau mā ono ki te Karauna.

E matapaetia ana ko ngā Moutere Titi, pā tata atu ki Rakiura, te kēhi tuatahi ka rangona ki te Kōti Teitei i tēnei tau.

He māharahara o Mahuta rāua ko Flavell ki te nama ka tau atu ki ngā kaitono.

E ai ki a Mahuta, “Mēnā ka whakaaetia e te kōti teitei he take kei roto i ēnei petihana, ae, me whakaaro anō te Karauna ki ngā utu kia haria kia haere tōtika tā rātou petihana i ua i te kōti teitei.”

Hei tā Flavell, “Wētahi kua roa e tatari ana ki te kōkiri i wā rātou take ki mua i te aroaro o te Kāwanatanga rānei, o te kōti rānei. Nō reira mēnā ka taea e rātou te whakatakoto i tēnei tau tonu, ka pai hoki.”

Kāti e ai ki te Karauna, kei te whakawhiti kōrero ia ki ētahi rōpū e toru i tēnei wā, ā, ka tīmata ngā mahi kohikohi taunaki i tēnei tau.

Heoi, o ngā tono rua tekau mā ono ki te Karauna, tekau kua whakakahoretia e ia.  E ai ki a Nanaia Mahuta he tohu pea o te māharahara ki te teitei o te taumata whakamana.

Kāti hei te marama ō Apereira a te tau e tū mai nei, toia te waka whakatakoto tono ki uta. Nō reira ko te karanga, kia kakama.