Kaupapa: Housing

He kaikiri te tātaritanga hoko whare a Reipa te kii o te Pāti Māori

E ai ki te Pāti Māori me whakamā ngā mema Māori o te Rōpū Reipa, inā ngā kōrero a te rōpū rā mō te iwi Āhia e hokohoko ana i ngā kāinga ki Aotearoa. 

E ai ki te kaiārahi takirua o te Pāti Māori, ki a Marama Fox, he kōrero kaikiri ēnā a Reipa, me kaua āna mema Māori e whakaae atu.  

E ai ki a Marama Fox kua roa te iwi Māori e patua ana ki ngā kōrero kaikiri, ā, me waiho ko te whakamā hei patu i te rōpū reipa i ana kōrero kaikiri ki te iwi Ahia.

E ai ki a Fox, “He kōrero kaikiri tēnei me kaua e whakaiti te tangata i runga i tō rātou kiri, i runga i tō rātou āhuatanga, kei te mōhio pai mātou ki taua tūāhuatanga.”

Inatata nei puta i a Reipa ana tataritanga mō te hokonga whare ki Tāmaki Makaurau me tana whakamahi i ngā īngoa e rite ana ki ngā īngoa Hainamana. E ai ki a Marama Fox he tirohanga kaikiri tēnā, hēoi, e whakahēngia ana tēnā e ngā mema Māori o Reipa.

Ki tā Fox, “Kei te mōhio rātou ki tēnei taumahatanga e noho ana ki ngā pokohiwi o ngāi tātou te iwi Māori, nōreira ki au nei me whakawero atu rātou ki a rātou anō kia whakakorengia tērā tūāhuatanga.”

Kāti e whakaae ana ngā rōpū e rua kei te Kāwanatanga te nui o te hē e raru ana te makete hoko whare.

Hei tā Fox, “Ko te hē, ko rātou e hē ana ko te kāwana. Nā rātou tēnā rautaki i whakarite. Nā rātou ēnei paihere i whakarite. Nō reira me aro atu mātou ki te kāwana me whakawero atu ki a rātou hei tini ēnā paihere.”

Nō reira, he aha te rongoā?  E ai ki te Pāti Māori me Reipa, aukatihia ta te hunga rāwaho hoko whare ki Aotearoa.

E ai ki a Fox, “Me noho te tangata ki Aotearoa nei me whakatinana ngā rohe me ngā pūtea. Mehemea kei te hiahia rātou te haramai ki Aotearoa kei te pai tēnā ki au engari kaua e haere ki Tāmaki Makaurau, tukuna i a rātou ki ngā rohe.”

Kāti, he take tēnei e kore e tau noa inangeto nei.