He kaieke ngaru kua toromi ki te moana o Karioitahi

Te Kāea

Koinei te rā tuawha noaiho mō ngā tatauranga toromi mō ngā hararei, ā kua eke nga aitua ki te toru aō ake i te matenga o tētahi kaieke ngaru ki te tātahi o Karioitahi he whitu tekau kiromita i te Tonga o Tamaki Makaurau.

Tokorua ngā tāngata o te iwi whānui, tekau mā rua ngā kauhauora o Karioitahi i ngana ki te whakaora i tētahi tangata kaiheke ngaru he whā tekau mā whitu ōna tau.

Ko tā tētahi kauhauora, ko Mike Lawrence, “i raru te kaiheke ngaru kotahi kiromita ki te raki o te karapu kauhauora, nā ētehi o tūwaewae i kauhoe atu kia whakahokia mai ki te akau, i ngahemo i tēra wā, katahi ka timata te whakaora manawa.”

Ahakoa he mōrearea te āhua o tēnei moana, me uaua ka kite i tētahi toromi ki ēnei o ngā wai.

Ko tā Mike Lawrence, “e tūwherawhera ana ki Te Tai o Rehua, nunui ngā āmai, he hau tonga ki te uru e kaha puhia nei, otira he mōrearea te moana i kōnei.”

Neke atu i te toru tau kua mate tētahi tangata i roto i taua taha moana, he wāhi kīkī i te tangata. Mō te tangata i toromi, ko ngā whakamarama a Mike Lawrence mōna, ko tērā tāna wā tuatahi i puta atu ki te eke ngaru.

“I whiwhi ia i tētahi papa eke ngaru mō te Kirihimete, i puta atu ia ki te moana mō te wā tuatahi, engari kaore i oti pai.”

Kei te wāhi tirotiro tūpapaku te memeha nei, ā kaore anō kia tukuna i tōna ingoa, hei te tuarima o Kohitātea ka oti te tatauranga toromi mō ngā hararei.