Kaupapa: Elections

He hononga kei te pae pea mā te Pāti Ipurangi me Mana

Ko te mahi tahi a te rōpū Mana me te pāti Ipurangi tētahi hononga tōrangapū tēnā pea ka kitea ake nei e tātou i ngā marama e haere ake nei, i a te pōtitanga matua o te motu e kainamu ana, e haere pērā ana whai muri iho i ngā kōrero a Kim DotCom i te hui ā tau o Mana i Rotorua.

I roto i ngā marama tata nei kua pahure, kua tūtaki a Kim DotCom rāua ko Hone Harawira ki te kōrero tahi mō te āhua me pēhea rā ngā pāti tōrangapū e mahi tahi ai, ā, he tūtakitanga i tōtara wāhi rua ai te pāti Mana, ā, i toko hoki rā te nui o ngā pātai.

Ko tā Kim DotCom mahi tuatahi he whakakore i te whakaaro ā te nuinga kua horekau ōna here ki te hunga e noho pōhara ana i Aotearoa nei.

I whai wāhi atu ngā mema o Mana ki te tuku i ō rātou pātai ki a DotCom, hēoi anō, kōtahi noa nei te pātai kei ngā ngutu o te marea.

Kei te kii tonu ake rā a Mana, horekau te pūtea i te take nui kia rātou, engari, e whakaae ana te kaiarahi o taua pāti mā te pāti Ipurangi anō rā te nuinga o ngā nama e utu.

Hei tā Hone Harawira e mea nei, kei te tūmanako atu rā ia ko Annette Sykes te tuatahi i te rārangi ingoa mehemea ka hono atu rā ki a DotCom mā, engari, kāre rātou mō te whakapuaki i tēnā whakatau i te rā nei.