He hīkoi kei te whakaritehia e ngā wātene Māori ki te Whare Pāremata

Mere McLean

He hīkoi kei te whakaritehia e ngā wātene Māori ki te Whare Pāremata hei te tau hou hei whakautu ki te whakatau a te Rōpū Whakamana i puta i te rā nei. 

Hei tā te Perehitini o ngā Wātene Māori hei ta Gloria Hughes, ka whakaūngia e rātou tō rātou hiahia, mā rātou anō tō rātou rōpū e whakahaere. 

Ko tā Gloria Hughes, kia whakahoutia o rātou whakahaere, ā, kia timata mai i runga.

E ai ki a Gloria Hughes, “Kua roa ngā Wātene Māori e tatari ana mo tēnei na te mea i ngā huinga i kite mātou kia hiki anō wa mātou mahi kia tū motuhake mātou koira wā mātou mahi i ngā toru tau ka huri.”

Kei raro ngā Wātene Māori i te Ture Whakawhanake Hapori Māori e tāea e rātou te awhina i te Māori.  Ko tā Hughes me noho te Kaunihera Māori ki raro i tēnei ture me tā rātou waha i ngā kaupapa Māori ki Aotearoa, engari anō tana rōpū kei te hiahia kia puta mai i te ture.

E ai ki ngā wātene Māori o Aotearoa tata ki te iwa rau o rātou mema, e rima rau ngā mema kei te tautoko i te kōkiri a Gloria Hughes me tāna, ehara i te mea kei te hiahia te katoa o ngā mema kia noho motuhake rātou.

Ko tā Gloria Hughes ko ngā kitenga i puta mai i te rōpū whakamana i te Tiriti o Waitangi he aki ano i tā rātou hiahia kia riro ma rātou anō hei whakahaere i a rātou ka whakaū tonu i tā rātou hikoi ka tū hei te tau hou.