He haerenga whakamaumahara i a Kāpene Pekama Kaa o Te Hokowhitu a Tū

Kua roa nei tētahi māpu Nāti e koingo ana ki te whiti atu ki te whakanui i tō rātau tipuna toa e takoto ana ki rāwāhi, ināianei kei te whakatinanahia e rātau tērā wawata.

He haerenga whakamaumahara.

Hei tā Te Rangi Matanuku Kaa, “Haere atu nei ki te whakanui i te kotahi rau tau nō te matenga o to mātau papa a Pekama Kaa.”

Ko tā Tākuta Kuni Jenkins, "He tuakana ki taku Pāpā i mate ia i Passchendaele i te Akuhata 1917."

He toa a Kāpene Pekama Kaa o Te Hokowhitu a Tū.

E ai ki a Hei tā Te Rangi Matanuku Kaa, “Ko ia te mea i whai ake i tērā ōna whanaunga i a Henare Kohere, i te matetanga o Henare Kohere ka riro atu mā tō mātau Pāpā ko ia te kaihautū e whakahaere nei ngā hōia i taua wā.”

Kua whakanuia a Pekama Kaa rāua ko Henare Kōhere ki te whare karakia o Hato Mēri ki Tikitiki.

Ko tā Te Rangi Matanuku Kaa, “Ki taku mōhio i ngā wā o mua he toru kē ngā anahera i roto i taua karaehe i ngā wā o mua, ana ka tangohia pea e te koroua rā a Apirana ka whakaurungia rāua tahi ki roto i te māra a te Karaiti.”

Ka whai te māpu Nāti nei i ngā ara i takahia e ō rātau tīpuna hōia.

Hei tā Te Rangi Matanuku Kaa, “Ngā wāhi takatū ai rātau ngā hoia i tērā wā. Mai Amiens, piki atu ki Belgium, arā, Dunkirk, ngā wāhi takatū ai rātau. Koirā tā mātau hiahia kia rongo ai i ngā wairua o rātau i mene atu ki te pō i te pakanga tuatahi.”

E ai ki a Te Rangi Matanuku Kaa, ka tuku karakia rātau ki runga i ngā rua kōiwi a ō rātau mātua tīpuna.