Kaupapa: Health

He ekenga nui mā te hunga tohe hikareti

Te Kuru o te Marama Dewes

Kua mana ngā ture hōu e aukati ai ngā tohu kamupene tūpeka ki ngā pākete hikareti, ā, ka whakanui hoki i ngā pikitia whakatūpato. He kokenga whakamua tēnei nā Te Kāwanatanga i a rātau e whakatata ana ki te whainga Auahi Kore rua mano rua tekau mā rima.

He ekenga nui mā te hunga tohe hikareti.

Hei tā te Tumuaki o Hāpai Te Hauora a Lance Norman, he mea nui tēnei.

Ka whakanuia ngā pikitia whakatūpato ki ngā pākete, ā, ka tangohia ngā whakatairanga a ngā kamupene tūpeka.

E ai ki ngā rangahau a Justinn Cochran ki Te Whare Wānanga a Tāmaki Makaurau, mā te whakanui i ēnei pikitia whakatūpato ki ngā pākete hikareti e akiaki pea i ngā kaimomi hikareti kia huri i ngā whakaaro, otirā ngā waiaro, e pā ana ki te kai hikareti.

I puta atu a Te Kāea ki te pātai atu ki te hunga kai hikareti mēnā rānei ka huri o rātau whakaaro i ēnei hanganga ture hou ā te Kāwanatanga, heoi i rerekē ngā whakaaro o tēnā, o tēnā.

Hei tā Norman he takahitanga pai tēnei heoi ka nui tonu ngā mahi kei mua.

Ko tāna, he wā tēnei kia kōkiri whakamua, arā, kia aro ki te hoko atu o ngā tūpeka kia tutuki ai te whainga auahi kore 2050.