He arotake kei te hāere whai muri i te matenga o tētahi tangata nōna e noho mauhere ana

Wepiha Te Kanawa

E toru ngā arotake kua rewa ake mō te matenga o tētahi tāne, he rua tekau ōna tau, nōna e noho ana ki ngā herehere pirihimana. I mauheretia ia whai muri i tāna whakatutū puehu ki tētahi huinga ngahau i tētahi kāinga i Manurewa, ā, tērā te pātai e rērere ana, he aha ia i mate ai?

I karangatia ngā pirihimana ki tētahi kāinga i Manurewa, i reira ka mauheretia tētahi tangata mō te takahi i te maungarongo, ā, ka haria ia ki te whare pirihimana i Manukau kia unu rā anō te haurangitanga ki a ia.  

Ko tā te Āpiha Matua ko John Tims, “ I tukuna he takuta ki te titiro ki a ia, engari na tona haka whawhai tē taea ngā tākuta ki te awhina.”

Hei tā ngā pirihimaha whai muri i te korenga o te tākuta e whai wāhi ki te tirotiro i a ia i te kotahi karaka i te ata, i mahue ake ia ki te rūma herehere, ā, ka hoki rātou ki te tirotiro anō i a ia e whā haora i muri iho, hēoi i te hē kē tōna hā, ā, ka kawea ake te whakaora manawa, ā, ka waea anōhia te waka tūroro.

Ko tā Tims ano, “i ta mātou hokinga atu i kite mātou kua mate kē ia.”

Kua kitea kētia e te rōia kairangi e Peter Williams ngā mate pēnei, i rō herehere, ā, hei ko tāna he nui rawa ngā auru kōhao i te pūnaha whakatikatika.

“He whakamomori te mahi a etahi i te whareherehere, a ko ratou i nga whare pirihimana, koira nga wa e rua ka mate ratou.”

Ko tā Tims ano,”he nui ngā pukenga a o mātou kaimahi i te whare pupuri tangata, he toru wiki a ratou ako i ngā mahi o tēnei wāhi, he tohunga ratou ki ngā mahi whakahaumaru tangata, ko te kaupapa matua o a ratou mahi he whakamaru ratou i ngā tangata o tēnei wāhi.

Hei manaaki i tōna whānau tē taea e ngā pirihimana te whakapuaki ake ko wai i mate, ā, ka kore te take o te mate e pūrangiaho kia oti rā anö te pūrongo a te kaipoka tūpāpaku.