Kaupapa: Elections

He āki te kaupapa ‘Vote Kapa Vote’ ki a Ngāi Māori ki te pōti

Wepiha Te Kanawa

Kua kitea ngā tāngata rongonui o Hollywood e tautoko ana i te wero waitio hei kohi pūtea mō ngā rōpū whai koha.  Ināianei ko ngā tino toki o te ao kapa haka e whai ana i taua rautaki, ki te whakatenatena i te iwi Māori kia puta ki te pōti.

Ko Tūtara Kauika Ki Rangataua, ko Te Waka Huia, ko Te Mātārae-i-Ōrehu, rātou ko Whangarā Mai Tawhiti, ko Te Iti Kahurangi ētahi o ngā kapa haka e tautoko ana i te kaupapa āki i te hunga pōti i te Kōwhiringa Matua, rua mano tekau mā whā, mā te whakaputa kiriata ki te whārangi pukamata 'Vote Kapa Vote'.

E tūwhera ana ngā wāhi pōti i tēnei wā, ā, e ai ki ngā tatau o te Komihana Pōti, he rua rau, e toru tekau mā whā mano, e rua rau, waru tekau mā toru te nui o ngā tāngata kei runga i te rārangi pōti Māori kua pōti kē.

He poto te wā kei te toe ki ēra kātahi anō ka werohia ki te mahi kiriata, ki te kore e tutuki i a rātou, ka mate rātou ki te utu i ngā nama o te rōpū tautapa ki Te Matatini ki Ōtautahi hei tērā tau.