English language haka goes viral

Kei te rongonui haere te whāataata o tētahi tāne i Pōneke e haka ana i roto i te reo Pākeha.

E rua tekau mā rua tau te pakeke o te kai-haka, o Winara Levi, ā hei tāna he haka ai tana haka i te reo pākeha kia tino mārama ai a nuipuku ki te riri o te Māori i muri mai i ngā whakamaharatanga mō te kotahi rau, e rima tekau tau o ngā pakanga whenua o Aotearoa.

Tata ki te rua mano ngā mātakihanga o tēnei haka i YouTube i ngā rā e toru noa. He tuku karere ki a Ngāi Tauiwi te hiahia a te kaihaka.

Hei tā Levi, “I te mea ki au nei he maha nga kupu he maha nga nawe he maha nga raru a te maori ki a pakeha and kei te taka nga kupu ra nga nawe ra ki nga taringa māro kaore ratou mo te paku marama i a matou korero.

Nā Winara tēnei i haka i te hui ruri, Poetry in Motion i Te Whanganui a Tara. Ko tana whāinga he hohou i te kupu, mā te hari me te koa, he wero anō hoki i ngā whakaaro o te tangata mō tēnei mea te ruri.

Hei tā Levi, “I te wa i tito au taua haka kaore e roa whai muri mai i tetahi rau rima tekau tau maumaharatanga mo nga pakanga o aotearoa no reira i reira te ihi te wehi i roto i au ano ko te ruri tetahi huarahi hei whakaputa i taua ihi maaku.”

E ai ki a Winara kei te hiahia ia kia whakairia te haka mā runga pakihere rokiroki, The Ranting Kiwi, ā, nāna me tāna hoa tata me Liam Jennings taua kaupapa i whakatū.

Hei tā Jennings, ““When we started seeing the views start happening yesterday and today, that’s when it was hitting us, you know, ‘hey we've actually done some good here’, because not only is that bringing understanding for people to understand the haka and the meaning of it, but also for our podcast and our show.”

Ko te whai a Winara kia tito haka anō a ngā rā ki tua mō te tūpono ka hōhonu ake ngā mōhiotanga a Ngāi Tauiwi mō te haka.