Kaupapa: Crime

E whakahē ana te kāwanatanga i te whakaaro e hāmenetia pokanoatia ana te Māori e te pūnaha ture taihara

E whakahē ana te kāwanatanga i ngā whakaaro, e hamenetia pokanoatia ana te Māori e te ope pirihimana, e te pūnaha ture taihara hoki, engari hei tā te Tumuaki Māori o Te Wāhanga Ture o Te Whare Wananga o Tāmaki Makaurau, ko te hunga e kawe ana i te ture me ngā rautaki anō hoki, e wairua kaikiri kē ana.

E mea ana tētahi ope nō te kotahitanga o ngā iwi o te ao, me rangahau te Kawanatanga i te take e whai wāhi nui mārika ana te Māori ki te pūnaha ture taihara i Aotearoa nei

50 paihēneti o te hunga tāne, e ono tekau mā rima paihēneti o te hunga wāhine kei roto i ngā whare herehere he Māaori. Ka mutu, 54 paihēneti o te hunga taitamariki e kitea ana e te Kooti Rangatahi he Māori, ā, o ngā kaihara taitamariki kei ngā Kooti Whānau, 71 paihēneti he Māori.

Ahakoa kua hanga rautaki te Kāwanatanga ki te kaupare ake i te take, pēnei i te rautaki mō te ope pirihimana e kiia nei ko te Huringa o Te Tai, Ngā Kooti Rangatahi Māori hoki, hei tā te tumuaki Māori o te Wāhanga Ture o Te Whare Wānanga o Tāmaki Makaurau, me aro te pūnaha ture taihara ki te tirohanga o Whanau Ora.

Hei tā Khylee Quince, he hua kino te whakaaro ki te raru nei hei raru Māori, engari me mahi ngātahi ngā rōpū tōrangapū, rātou ko ngā ratonga Māori me te Karauna kia kaupare i te raru.