E whai kapeneheihana ana ngā whānau i mauherea e ngā pirihimana i te wā o Operation 8

Mere McLean

E tika ana me whai utu rānaki ngā whānau i pākia e ngā mahi urutomo a ngā pirihimana i te tau rua mano, mā whitu. Koia tā Te Ururoa Flavell, mema pāremata o Te Waiariki, kua roa nei e tautoko ana i te whakaaro kia pērā.

E whai ana tēnei i te tono e kōkirihia ana e te roia o te whānau o Tūhoe Lambert, tētahi i mauheretia i roto i a Operation 8, kia utua te kotahi rau mano tāra ki te katoa o rātou i mauherea.

Na ngā mahi a ngā pirihimana i te wā o Operation 8, e āki ana te roia o te whanau o Tuhoe Lambert, tērā i mauherea i Tamaki Makaurau, he utu kapeneheihana.  Ko tētahi e tautoko ana i tērā āki ko te mema Māori o Te Waiariki a Te Ururoa Flavell.

Ko tā Te Ururoa Flavell. ”He hapa nui i puta i tērā wa, he hara nui me kii mo te pirihimana, kaare ano kia tutuki noa.”

Kei te whai ngā mema tokorima o te whānau o Tuhoe Lambert, i te kotahi rau mano tāra mo ia o rātou na runga i te pākaha o te urutomo a ngā pirihimana ki tō rātou kāinga i Manurewa i te tau rua mano ma whitu.  E mau tonu ana ki ngā whakaaro ko te mau pū a ngā pirihimana, he āhuatanga e mau tonu ana hoki i a Tame Iti, ko ia hoki i mauherea.

Ko tā Tame Iti, “Ka tika ano tera, mo tera whanau, wērā uri o tatau nei na ki te tono, ki te wero i te Karauna i nga mahi he i eke ki runga i tērā whanau nga Lamberts o Tamaki Makaurau.” 

Kei te whakarite hoki te hapori o Ruatoki me Tuhoe i tētahi take mō te kōti nā runga i ngā mahi whakatuma o te tau rua mano ma whitu, ā, ka āta mātakitaki rātou i te ahu pēhea o tēnei take.  I hamenetia a Tuhoe Lambert whai muri i ngā urutomo, engari i te tau rua mano tekau ma tahi ka rere ia ki tua o paerau.

Ko tā Te Ururoa, “Kāre ano te pirihimana kia whakatū i tōna ringa me te kī atu nana tonu tērā ahua i kokiri i roto i te ahuatanga kore whai i te ture kātahi ko te he, ka rua.”

Tekau ma waru te hunga i mauherea ao ake i ngā urutomohanga ki Ruatoki me ētahi atu pito o te whenua. Kāhore ngä pirihimana i te kōrero i tēnei wā, ina kei mua tonu tënei take i te kōti.