Kaupapa: Christmas

E whai ana ngā Pirihimana ki te whakaheke iho i ngā aituā waka

Wepiha Te Kanawa

E aronui ana ngā pirihimana ki te whakawhiu i te hunga whakatere motokā i ēnei hararei, hei whakaheke i te rahi o ngā aituā, otirā i ngā mate i runga i ngā huarahi.

I te wā kirihimete nei, tokorua ngā tāne, tokorua hoki ngā kōtiro i aituāhia i te tukinga o tētahi taraka ki tētahi waka i Uretiti, whakateraki i Waipu. E rua anō ngā tukinga nui i tū ki Te Waipounamu, otirā ki Glentui me Hurunui, ā, e toru hoki ngā aituā ki Te Moana a Toi, arā ki Te Puna, ki Te Puke me Paengaroa.

Ka mutu, ai ki te pūrongo o tā mātou karere a Wepiha Te Kanawa, kei te kino haere ngā tatau o te hunga e aituāhia ana i runga i ngā rori.

Koinei te wāhanga o te tau e hākoakoa marika ai te tangata, ā, mō ētahi o ngā kaitaraiwa waka i runga i ngā rōri, kei tētahi tohutohu pakupaku tonu te pitomata e raru ai tō hararei.

Mena he kotahi, he rua kiromita rānei neke atu i te tohu-tere, ka āhei te hāmene me tuku te tīkiti ki a koe. Koira te take e kaha ana ngā pirihimana ki te kohete i te hunga taraiwa tere.

Me te manako o Heihana Chris ka pai te rere o ngā ra whakatā mō te iwi.

Hei apōpō puta ai ngā whakamārama o te hunga i parekura i runga i ngā huarahi matua i ēnei rangi Kirihimete.