Kaupapa: Iwi Settlements

E waru mano, e rima rau heketea o ngā whenua o te Karauna kua hokona e Tūwharetoa

Mere McLean

E waru mano, e rima rau heketea o ngā whenua o te Karauna i Te Puku o te Ika kua hokona mai e Ngā Kai-tiaki i te Whakataunga o Tūwharetoa me ētahi uepū e rima kē atu o Tūwharetoa.

He hokonga e karangatia ana, ko tētahi tohu nui whakaharahara mō Ngāti Tūwharetoa. I te marae o Rongomai.

He paitawhiti tēnei mō Tūwharetoa, ahakoa rua miriora tāra te utu.

E ai ki a Paranapa Otimi, “Ko te take nei, kei te hoki whenua mai, nā kei te hoki whenua mai mai i te Karauna kei a rātou i aua wā e tāhaetia ēnei whenua.”

Kei te hokonga nei he whā mano heketea o te rākau paina, me te whenua kei raro i te whare herehere o Tongariro Rangipo. 

E ai ki te Heamana mō te Tari Tiaki Iwi o Tūwharetoa, a Dylan Tahau, “Ahakoa ko wai kei te hoko, kei te hoki mai te whenua o Hautu o Rangipo ki a Ngāti Tūwharetoa, ki a hoki mai ki te iwi tūturu.”

Nā te Tari Tiaki Iwi o Tūwharetoa, ngā pōari whenua ngāhere tokorua me ngā poari whenua pāmu tokotoru i kotahi ai kia mau i a rātou te mana whakahaere ki te hoko i ngā whenua.

Hei tā Dylan Tahau, “Ko te mea nui kei whakatikangia i ngā tūahuatanga o te mahi ngātahi, tuatahi, kua mahi ngātahi e Tūwharetoa, e ngā pakihi e ono, e ngā hapū e waru, kia tū kōrero ngātahi ki te Karauna te whakahoki mai i wēnei taonga whenua, ā, me te mea nui hoki kia ea ngā mamae o rātou mā.”

Kua tekau mā rua marama te roa ki te whakatau i ngā kōrero whakawhiti, inaianei, ko Tūwharetoa tētahi o ngā kaipupuri whenua nui o roto i te rohe o Taupo nui a Tia.