Ngā kaupapa: Entertainment, NZ Music, Waiata Māori

E toru tekau tau kua mahue ake nei, kei te maumaharatia tonutia a Tui Teka

He hokinga mahara, he koanga ngākau, koia nei te rā i kapohia ai a Prince Tui Teka e te ringa o aituā, i te tau kotahi mano, iwa rau, waru tekau mā rima. 

Ko tana waiata i eke ki ngā taumata rongonui ko E Ipo tēra, i rewaina i te tau kotahi mano, iwa rau, waru tekau mā toru. Ka tae ki te tūnga tuatahi, i pērā anō ngā waiata Māori a Deane Waretini "Te Piriti" i te tau kotahi mano, iwa rau, waru tekau mā tahi, me "Whakāria Mai" nā Howard Morrison, i te tau kotahi mano, iwa rau, waru tekau mā rua.

He kaiwaiata, he kaiwhakāri, he hātekēhi, he whakatoi, arā atu arā atu, ngā taera e tenei tangata e kīa nei ko Prince Tui Teka.

I whānau mai aia i te Manawa o Te Urewera, ki Ruatāhuna i te tau 1937, i reira aia i poipoia e ōna mātua ki ngā mahi rakuraku kitā, me te whakatangitangi i te saxophone.

He maha ana waiata i eke ki ngā rārangi rongonui o Aotearoa i runga i ngā reo irirangi Māori me ngā reo irirangi auraki ano. Heoi i te tīmatanga o ngā tau waru tekau o tērā atu rau tau, ka kake tana waiata a “E Ipo” ki te taumata, me te aha he wā tera e pakaru mai ana ngā waiata reo Māori ki te ao.

Nā reira no te 23 o ngā rā o Kohi-Tātea 1985 ka hinga te tangata nui, tangata rongonui, nui te hari, nui te koa, nui te reo, nui ngā mea katoa, a Prince Tui Teka, e kore rawa aia e warewaretia.