E toru ngā kiriata Māori ka whakaatu atu ki te Toronto Film Festival

Image sourced from Born To Dance film

Ko ‘Born To Dance’ tētahi o ngā kiriata no Aotearoa ka whakaatuhia ki te ao mo te wā tuatahi ki te Toronto International Film Festival, ko Tammy Davis te ringa tohu.

Tapiri atu ka whakaatuhia te kiriata a Leanne Pooley ko ‘25 April’ me te kiriata a Pietra Brettkelly,  ‘A Flickering Truth’ ki taua ahurei motuhake. 

Ka whakaatu atu te kiriata ‘Born to Dance’ i te whai a tētahi tama ko Tu Kaea i roto i te ao kanikani HIp Hop me tōna hiahia ki te uru atu ki te rōpū kanikani o K-Crew, hēoi he whāinga huna tēnei mōna, kare ia i te whāki atu ki tōna hoa pūmau a Benjy. Ka kite atu ngā kaimatakitaki i ngā piki me ngā heke o te tama nei i a ia e rapu ana i ōna moemoeā. Otira ko ētahi o ngā kanikani kei roto i mahia e Parris Goebel.

Ko ngā whetū ō roto ko Stan Walker, ko Tia Maipi rātou ko Kherington Payne.

Ko te kiriata 25 April’ nā Leanne Pooley i tohu e whakaatu atu ana i ngā kōrero e hāngai ana ki Karipori e ai ki ētahi reta me ētahi puka tuhi a ngā hōia ō mua i whai wāhi ki taua whawhai. 

Ko te kiriata tuatoru ko  ‘A Flickering Truth’, nā Pietra Brettkelly i tohu, he pakipūmeka e whakaatu atu ana i te whai a ētahi uri o Afghanistan ki te haumaru i ētahi kiriata me ētahi pukapuka e whakaatu atu ana i ngā tikanga o ngā uri Afghan. 

Ia tau ka whakahāerehia tēnei kaupapa, ka whakaatuhia ngā kiriata toru rau mai ngā whenua ono tekau.